Bejn kalkolu u skalkolu

Nhar it-Tlieta li għaddha l-Viċi Kap tal-Partit Nazzjonalista għal Affarijiet tal-Parlament David Agius, f’isem il-Partit Nazzjonalista ressaq talba lir-regolatur għas-sevizzi tad-dawl u ilma (REWS) sabiex dan, skond il-poteri mgħotija lilu mill-liġi, jinvestiga l-proċess li bih l-Arms qegħda toħroġ il-kontijiet tad-dawl u l-ilma.

Minn naħa tiegħu l-Partit Laburista qiegħed bħal donnu jilgħab xi logħba noli hekk kif filwaqt li fl-ebda ħin ma’ qiegħed jiċħad dak li qiegħed jgħid il-Partit Nazzjonalista, l-media Laburista qegħda tipprova tiżgwida lis-semmiegħa u telespettaturi tagħha.

Il-media Laburista qegħda tipprova tgħaqqad din il-kwistjoni ma’ xi kwistjoni dwar il-prezz ta’ kull unit ta’ dawl u ilma konsmati. Il-media Laburista qegħda tagħmel dan f’attentat ċar li tiżgwida lil pubbliku. Il-kwistjoni m’hijiex dwar il-prezz ta’ kull unit ta’ dawl u ilma. Dik hija diskussjoni separata u li fl-aħħar mill-aħħar m’għandha x’taqsam xejn mal-kwistjoni preżenti.

Il-kwistjoni preżenti hija dwar il-mod kif l-Arms qegħda taħdem il-kontijiet tad-dawl u l-ilma. Fl-ewwel skeda fil-liġi sussidjarja 545.01 hemm miktub bl-aktar mod ċar li fejn jidħol il-kalkolu dwar il-konsum f’post residenzjali,

Bla  ħsara  għad-dispożizzjonijiet  l-oħra  ta’  dawn  ir-  regolamenti,  Servizz għal Post Residenzjali ikun suġġett għat-Tariffa tal-Konsum li ġejja li hija bbażata fuq konsum kumulattiv annwali u li tista’ tiġi komputata fuq bażi pro rata:

i)Għal kull kWh ta’ l-ewwel 2,000 kWh ....................€0.1047; u

ii)Għal kull kWh fuq 4,000 kWh ta’ wara ...................€0.1298; u

iii)Għal kull kWh fuq 4,000 kWh ta’ wara ...................€0.1607; u

iv)Għal kull kWh fuq 10,000 kWh ta’ wara .................€0.3420; u

v)Għal kull kWh mill-bqija tal-konsum ......................€0.6076.

L-ewwel u qabel kollox wieħed irid jibda billi jifhem li, forsi għal kontra ta’ kif ħafna jaħsbu, l-konsum tad-dawl mhux kalkulkat bi prezz fiss għal kull unit konsumata. Aktar ma’ wieħed jikkonsma aktar jgħola l-prezz ta’ kull unit, f’miżura ċara ntiża biex tinkoraġixxi l-għaqal u n-nuqqas ta’ ħela. B’hekk jekk per eżempju wieħed juża 1800 kWh dan iħallas €0.1047 għal kull kWH imma jekk wieħed juża 2500 dan ser iħallas €0.1047 għal kull kWh sa 2,000 kWh u €0.1298 fuq il-500 kWh l-oħra li jkun ikonsma. Meta wieħed jieħu dan il-kalkolu fuq bażi annwali, malajr wieħed jifhem għalhekk li x-xhur fejn wieħed juża ftit elettriku, bħal per eżempju Marzu u April, jgħinu u jpattu għax-xhur fejn wieħed juża ħafna elettriku bħal Diċembru u Awwissu. B’jgħinu hawn qed nifhmu li jgħinu sabiex residenza kemm jista’ jkun ma’ tikkonsmax dawl bir-rata aktar għolja kif kwotat hawn fuq mill-liġi.

Li jidher li qiegħed isir fil-preżent huwa l-Arms qegħda taqsam dawn ir-rati fuq kull xahar, b’tali mod iżda li jekk wieħed ma jikkonsmax dawk il-units bir-rati l-irħas, dawn jintilfu u fix-xahar ta’ wara xorta jħallas r-rata l-għolja.

Mela, ejja nieħdu eżempju sempliċi ħafna. Jekk naqbdu 2,000 kWh u naqsmuh ugwalment bejn tnax il-xahar; jiġi 166.67kWh. Issa jekk per eżempju f’Marzu wieħed ikun uża 150kWh, jiġifieri jkun fadallu 16.67kWh bir-rata l-irħisa mhux użati, dawn is-16.67kWh ma jmorrux għax-xhur ta’ wara imma jispiċċaw jintilfu biex b’hekk jekk mbgħad fix-xahar ta’ wara, April, l-istess konsumatur ikun uża 183.34kWh, jiġifieri 16.67kWh aktar minn l-2,000 kWh mqassma tul tnax il-xahar, minflok mas-16.67kWh mhux użati f’Marzu jagħmlu tajjeb għas-16.67kWh użati over and above f’April, dawn is-16.67kWh jispiċċaw jitħallsu bir-rata aktar għolja. 

Il-liġi tgħid b’mod ċar li “bbażata fuq konsum kumulattiv annwali u li tista’ tiġi komputata fuq bażi pro rata”. Dan ifisser li filwaqt li kont jista’ jinħareġ bi frekwenza li tagħżel l-Arms għaliex il-liġi tgħid li jista’ jiġi komputat fuq bażi pro rata tali konsum irrid jittieħed fuq bażi kumulattiva annwali, jiġifieri fuq bażi ta’ sena sħiħa u ma’ jistax jiġi diviż bix-xhur b’xahar ma jkollu ebda rabta max-xahar ta’ warajh, meta wieħed qed jitkellem fi ħdan l-istess sena.

L-appell hawnhekk huwa wieħed ċar; il-gvern jeħtieġ li jaġixxi llum qabel għada sabiex dan l-abbuż sfaċċat jieqaf.

It-tmiem tal-2017 u l-bidu ta’ l-2018

Ninstabu fl-aħħar jiem tas-sena 2017 u għalhekk ftit jiem il-bod mill-bidu tas-sena 2018. Bħalma jiġri lejn kull tmiem ta’ sena, dawn l-aħħar jiem tas-sena jkunu okkażjoni perfetta sabiex niftakru ftit minn xiex inkunu għaddejna matul is-sena. Niftakru mhux għax għandna nħarsu lura imma sabiex nieħdu l-lezzjonijiet ta’ dak li jkun offra l-passat riċenti u nitgħallmu minnhom għal futur.

L-Elezzjoni Ġenerali
Is-sena 2017 fetħet fuq nota ta’ skandlu internazzjonali li kien qiegħed joħloq pressjoni kbira fuq il-gvern Laburista, jiġifieri l-iskandlu tal-Panama Papers. Il-gvern Laburista kien qiegħed isib ruħu bi kritika internazzjonali u b’dubji dejjem jikbru minn ċirku dejjem jikber fis-soċjeta’ u anke fuq livell internazzjonali. F’Ġunju 2017 il-Prim Ministru għamel kalkolu politiku u sejjaħ elezzjoni ġenerali. Kien kalkolu politiku meqjus u korett f’termini elettorali għaliex il-Partit Laburista ħareġ rebbieħ bil-kbir. Kien kalkolu żbaljat għal kollox iżda f’termini ta’ kemm tali riżultat kien ser iservi ta’ proċess ta’ white wash għall-akbar skandlu politiku li qatt ra pajjiżna. Il-gvern Laburista qiegħed itemm l-2017 bl-istess mod li bdiha; b’dubji dejjem jikbru u b’kritika ħarxa fuq livell internazzjonali.

Daphne Caruana Galizia

L-2017 tibqa’ mfakkra wkoll għall-qtil brutali tal-ġurnalista Daphne Caruana Galizia. Kien qtil barbaru u brutali li ħasad lil kull min għandu għal qalbu l-liberta’ u d-demokrazija f’pajjiżna. Dan il-kapitlu mill-aktar iswed li nfetaħ beraħ f’Ottubru 2017 ser jibqa’ magħna fix-xhur li ġejjin fl-2018. Il-qtil ta’ ġurnalista investigattiva huwa ta’ għajb għal pajjiż li jaspira li jkun meqjus bħala demokrazija Ewropea. Pajjiżna issa qed jistenna li dwar dan il-każ iseħħ ġustizzja.

Adrian Delia, David Agius u Robert Arrigo
Is-sena 2017 kienet sena ta’ bidla għal Partit Nazzjonalista. Kienet is-sena li fiha t-tesserati bl-aktar mod miftuħ u demokratiku għażlu bl-liberta’ sħiħa lil Adrian Delia bħala Kap tal-Partit Nazzjonalista, b’David Agius u Robert Arrigo bħala Viċi Kapijiet. It-triq il-quddiem għal Partit Nazzjonalista mhijiex waħda faċli u bla dubju ta’ xejn l-2018 ser tkun sena ta’ sfidi għal Partit Nazzjonalista. Perswas iżda li bi spirtu ta’ għaqda, naħdmu lkoll id f’id, taħt it-tmexxija ta’ Adrian Delia nistgħu mill-ġdid noffru lil pajjiżna Partit Nazzjonalista b’saħħtu; oppożizzjoni pożittiva li toffri l-id tal-ħbiberija fejn ikun fl-aqwa interess nazzjonali u fl-istess waqt tkun tarka ta’ difiża u toffri kritika ċara u ħarxa fejn l-aqwa interess nazzjonali jitlob li jsir hekk.

Donald Trump
Fuq livell internazzjonali l-figura ta’ Donald Trump iddominat l-aħbarijiet. Il-Presidenza ta’ Trump bħal donnu qegħda tassigura li l-Partit Repubblikan ser ikollu sfida iebsa sew f’kull elezzjoni li jmiss fl-Istati Uniti sakemm idumm din il-Presidenza. Trump kien elett fuq biljett populist; biljett li fih wiegħed lil kullħadd kollox u kanta d-diska li ħafna riedu jisimgħu. Din id-diska ġiet kantata anke jekk kien ċar li kien ser ikun impossibli li titwettaq. Bla dubju ta’ xejn is-sena 2017 kienet kulurita għal Trump; minn stejjer ta’ tkeċċija wara l-oħra fil-gvern tiegħu, għal suċċess parlamentari fir-riforma tal-liġi tat-tassazzjoni, għal kontroversja internazzjonali dwar id-dikjarazzjoni ta’ Ġerusalemm bħala l-belt kapitali ta’ Iżrael, għal numru ta’ telfiet elettorali koroh għal Partit Repubblikan.

L-2018
Diffiċli wieħed jgħid x’ser toffri l-2018. Għalhekk ejja nħarsu lejn il-futur b’lenti pożittiva u b’entużjażmu. Minn hawn nieħu l-opportunita’ nawgura lil qarreja kollha ta’ In-Nazzjon bidu tas-sena mill-aqwa. Appell ukoll sabiex kullħadd jiċċelebra lejliet l-ewwel tas-sena b’responsabilita’. Ejja nieħdu gost mingħajr ma’ nkunu ta’ deni għal ħadd.

Bejn proċess elettorali u proċess ta’ tiġdid

Fi tmiem il-ġimgħa li għaddiet it-tesserati tal-Partit Nazzjonalista kienu mill-ġdid msejħa sabiex jagħmlu għażla. Din id-darba t-tesserati kienu msejħa jagħżlu żewġ Viċi Kapijiet ġodda għal Partit Nazzjonalista. 

Qabel xejn ikun sewwa u ġust li wieħed jibda billi jrodd ħajr lil Beppe Fenech Adami u Mario De Marco li tul l-aħħar snin servew fil-kariga ta’ Viċi Kap. Bla dubju ta’ xejn ftit jista’ jkun hemm dubju dwar is-sens ta’ sagrifiċċju personali li mxew bih Beppe u Mario u s-sens ta’ dedikazzjoni assoluta li dejjem urew lejn il-pajjiż u l-Partit Nazzjonalista. Għalkemm issa Beppe u Mario mhumiex ser iservu iżjed fil-kariga ta’ Viċi Kap għad fadlilhom ħafna x’joffru lil Partit Nazzjonalista. 

It-tmiem ta’ Beppe u Mario mill-kariga ta’ Viċi Kap tfisser ukoll il-bidu tal-ħidma ta’ David Agius u Robert Arrigo fil-kariga ta’ Viċi Kap. F’dawn it-tnejn minn nies il-Partit Nazzjonalista għandu potenzjal kbir. 

David Agius għandu kwalitajiet mill-aqwa fis-sens li jlaqqa’ f’persuna waħda l-abilta’ teknika fit-tħaddim tal-‘logħba’ parlamentari u abilta’ ċara fil-kommunikazzjoni, mhux biss kommunikazzjoni fis-sens tal-mass media imma anke fuq livell personali. Kwalitajiet li bla dubju ta’ xejn ser jgħinu lil David Agius sabiex ikun ta’ spalla għal Kap tal-Partit Adrian Delia kemm fil-ħidma parlamentari tal-Partit, li bla dubju ta’ xejn dejjem hi waħda kumplessa; kif ukoll fil-ħidma tal-partit sabiex il-partit ikun tassew qrib in-nies u fost in-nies. Għandi fiduċja sħiħa, li kif dejjem għamel fil-passat David Agius ser ikompli jkun xhieda ta’ servizz leali lejn il-pajjiż u l-partit. 

Minn naħa l-oħra f’Robert Arrigo l-Partit Nazzjonalista għandu persuna bi kwalitajiet organizzativi mill-aqwa. Persuna li fih tispikka l-enerġija, l-ħeġġa u l-idejat ġodda ta’ kif il-Partit Nazzjonalista jista’ jkompli jieħu l-ħajja. Persuna li l-ħidma politika tiegħu hija karaterizzata minn elettorat fid-disgħa u l-għaxar distrett li jsib f’Robert Arrigo mhux biss politiku denju imma ħabib u spalla li dejjem lest li jgħin. Il-kwalitajiet organizzattivi ta’ Robert Arrigo magħquda ma’ din l-abilta’ li jkun qrib in-nies u ta’ spalla għan-nies huma ċertament kwalitajiet li ser jagħmlu minn Robert Arrigo sisien importanti għal Partit Nazzjonalista u għal Kap tal-Partit Adrian Delia. Fuq kollox ser jagħmlu minn Robert Arrigo persuna li ser ikun strumentali fit-tisħiħ tal-Partit Nazzjonalista; xi ħaġa li bla dubju ta’ xejn hija fl-aqwa interess nazzjonali. 

Ikun żball jekk ninsew li f’din it-tellieqa kien hemm żewġ kontestanti oħra. Ikun żball jekk ma nurux apprezzament lejn Edwin Vassallo u l-Perit Toni Bezzina. F’Edwin Vassallo u l-Perit Toni Bezzina l-Partit Nazzjonalista għandu żewġ politiċi ġenwini li motivati mill-ġenwinita’ tagħhom offrew li jkunu ta’ servizz. Żewġ politiċi li għalkemm l-elettorat ma’ sejħilhomx sabiex iservu bħala Viċi Kap bla dubju ta’ xejn għandhom ħafna ħidma x’joffru lil Partit Nazzjonalista u għandu jkun aċċertat li t-tnejn jingħataw spazju sħiħ sabiex il-potenzjal tagħhom jintuża bl-aħjar mod possibli. Fuq kollox huma żewġ politiċi li wkoll bil-ħidma attivta’ tagħhom għandu ħafna x’jiggwadanja l-pajjiż u l-partit. 

Prosit!

Ngħalaq billi ngħati l-awguri tiegħi lil dawk kollha li f’dawn il-jiem qegħdin jiggradwaw. Awguri u prosit talli l-ħidma tagħhom qegħda tgħati l-frott. Bla dubju ta’ xejn fuq nota personali ħafna ngħati l-awguri lil Charlene li din il-ġimgħa gradwat fil-kors tal-liġi. Prosit Charlene...kburi bik!

-->