L-Isfida tal-25 ta' Mejju

Fadal ftit aktar minn ġimgħa qabel bħala poplu ninstabu msejjħa sabiex nagħmlu żewġ għażliet. Kull wieħed u waħda minnha jinstab msejjaħ sabiex fuq livell nazzjonali jagħżel sitt membri ġodda tal-Parlament Ewropew u fuq livell lokali jagħżel il-membri l-ġodda tal-Kunsill Lokali rispettiv.

Politika negattiva?

Matul din il-kampanja spikkat il-politika pożittiva tal-Partit Nazzjonalista. Dan huwa l-partit politiku li mill-bankijiet ta’ l-oppożizzjoni qiegħed iressaq proposti kemm bħala ħidma fuq livell Ewropew kif ukoll bħala ħidma fuq livell lokali. Partit politiku b’manifest elettorali li b’ħidma u impenn iwassal sabiex il-Partit Nazzjonalista jagħmel differenza konkreta fil-ħajja ta’ kuljum.

Li partit fl-oppożizzjoni jfittex li jagħmel differenza minflok ma’ sempliċiment ikun kritiku tal-gvern tal-ġurnata hija l-aqwa turija ta’ oppożizzjoni li tassew trid tibni politika tan-nies, politika li tagħmel differenza, politika pożittiva u propożittiva.

L-attakki ma’ jieqfux

Minn naħa l-oħra l-kampanja tal-Partit Laburista hija karaterizzata minn sensiela ta’ attakki negattivi fil-konfront tal-Partit Nazzjonalista. Kampanja li fil-qalba tagħha hemm biss il-mira li jiġi oskurat il-Partit Nazzjonalista u l-kap tal-Partit Nazzjonalista Adrian Delia u ftit li xejn hemm il-mira li ssir xi differenza.

Naturalment wieħed irid hawn jifhem li dawn l-elezzjonijiet huma elezzjonijiet li storikament li kien għal Partit Laburista ma’ kienux qegħdin isiru. Dan għaliex il-Partit Laburista kien il-Partit li oppona sia is-sħubija tagħna fl-Unjoni Ewropea kif ukoll it-twaqqif tal-Kunsilli Lokali f’pajjiżna.

Forsi dan ix-xettiċiżmu storiku iwassal sabiex il-Partit Laburista qajla jemmen li jista’ jagħmel differenza fuq livell Ewropew u fuq livell lokali jekk minflok ma’ juża l-enerġija u r-riżorsi tiegħu f’attakki politiċi jużahom fi proposti.

Il-messaġġ tagħna

Il-messaġġ tagħna bħala poplu jeħtieġ li jkun ċar. Messaġġ favur politika nadifa, politika onesta’, politika li temmen fil-ġustizzja, politika li tfittex li tagħmel differenza għal ħafna minflok differenza biss għal ftit. Politika mibnija fuq valuri sodi li tirispetta l-valur tal-ħajja, politika mibnija fuq il-premessa li l-iżilvupp ekonomiku u l-ħarsien ambjentali mhumiex għeddewa ta’ xulxin imma jistgħu jaħdmu id f’id jekk wieħed jagħraf iżomm bilanċ. Politika li hija interessata fil-kisba tar-riżultati għal poplu u mhux biss interessata fil-kisba ta’ rekords elettorali.

Dan il-messaġġ hemm biss mod wieħed kif ngħadduh b’mod ċar; vot lil kandidati kollha tal-Partit Nazzjonalista. Fuq il-lista hemm naturalment kandidati minn partiti politiċi oħra apparti dawk tal-Partit Laburista u Partit Nazzjonalista. Jeħtieġ li l-messaġġ tagħna ikun wieħed unit u b’saħħtu. Jekk il-messaġġ tagħna jinfirex inkunu qegħdin nagħmluha faċli sabiex il-messaġġ jidgħajjef.

10 kandidati ta’ ħila u kapaċita’

Il-Partit Nazzjonalista għandu fuq il-lista tiegħu għal Parlament Ewropew għaxar kandidati ta’ kapaċita’ u ħila. Kollha kandidati b’valuri sodi, kollha kandidati li lesti jxammru l-kmiem u jaħdmu. Kollha kandidati li ħaqqhom l-appoġġ tagħna għaliex kollha kandidati li ser jaħdmu fl-ispirtu pożittiv tal-Partit Nazzjonalista.

Team Balzan

Fil-każ tiegħi, fuq livell lokali għandi interess personali f’Ħal Balzan ġa la darba dan il-lokal huwa d-dar tiegħi u huwa wkoll fejn jien kandidat. F’Ħal Balzan kburi li ninstab parti mit-team tal-Partit Nazzjonalista; team magħmul minn sitt kandidati; kull kandidat b’ħafna x’joffri għal ġid ta’ Ħal Balzan u l-Balzanin. Hawn ukoll l-appell huwa għal vot għal kull kandidat tal-Partit Nazzjonalista, mill-wieħed sas-sitta.

The Blockchain Island

Il-bieraħ bħala Forum Professjonisti Partit Nazzjonalista (FPPN) organizzajna konferenza bit-titlu The Blockchain Conference. Konferenza li matulha kellna kelliema, lokali u internazzjonali, li għenu sabiex inkisbet aktar informazzjoni dwar il-blockchain u l-crypto currencies.

Forsi l-ewwel u qabel kollox tajjeb li fi kliem sempliċi wieħed ifisser il-kliem blockchain u crypto currency. Fi kliem sempliċi ħafna blockchain hija sistema moderna u elettronika ta’ kif jinżamm kont ta’ transazzjonijiet. Bħalma fil-passat mill-ktieb tal-bank qlibna għall-internet banking u l-ATM Machines hekk ukoll il-blockchain jirrapreżenta l-pass li jmiss. Naturalment, bħalma spiss jiġri fl-avvanzi teknoloġiċi, l-blockchain mhijiex xi ħaġa ta’ interess għal bankiera biss imma għandha użu u implikazzjonijiet ferm aktar wiesgħa. Fil-fatt jekk wieħed jisfrutta l-potenzjal sħiħ tal-blockchain il-bidla ser taffetwa prattikament kull qasam fejn hemm transazzjoni.

Minn naħa l-oħra crypto currency hija mekkaniżmu ta’ investiment. Forsi mal-qarreja ta’ In-Nazzjon il-kelma Bitcoin hija aktar familjari minn crypto currency. Fir-realta’ Bitcoin hija biss eżempju wieħed ta’ crypto currency minn fost ħafna li hemm fis-suq. Mhijiex munita li biha tmur tixtri l-gazzetta jew tmur għand is-supermarket tagħmel ix-xirja. Hija pero’ tip ġdid ta’ investiment, li bħal kull investiment ieħor jista’ jitla’ jew jinżel fil-valur.

Irridu jew ma’ rridux dawn l-avvanzi ser jimpattaw lil Malta. Bħala pajjiż fejn is-settur finanzjarju huwa kolonna importanti fl-ekonomija, jeħtieġ li minflok nibqaw ċassi u nistennew sakemm nkunu lura nieħdu aħna l-ewwel pass u nilqgħu dawn l-avvanzi billi nippreparaw ruħna.

Pajjiżna jeħtieġ li jkollu qafas legali sod u robust sabiex ikun jista’ jkun minn ta’ quddiem nett kemm fl-adozzjoni tat-teknoloġija tal-blockchain kif ukoll fl-użu tal-crypto currencies. Dan il-qafas legali robust għandu jservi żewġ għanijiet prinċipali. L-ewwel u qabel kollox għandu jservi sabiex jiddefendi lil pajjiżna mill-possibilita’ ta’ abbuż. Bħal kull qasam ġdid, dan il-qasam, partikolarmanent il-crypto currencies, huwa miftuħ għar-riskju tal-abbuż. Abbuż li jkun ta’ detriment kemm għal konsumatur kif ukoll għar-reputazzjoni ta’ pajjiżna. Qafas regolatorju sod jgħin sabiex niġġieldu kontra din il-possibilita’. It-tieni nies, il-fatt li Malta jkollha qafas stabilit u regolarizzat għandha tgħin sabiex investituri serji jaraw f’Malta ġurisdizzjoni attrajenti u b’hekk il-possibilita’ ta’ investiment serju f’dan il-qasam tiżdied.

Huwa f’dan l-ispirtu li l-gvern għandu jilqa’ b’idejn miftuħa passi bħalma għamlet l-FPPN li xxerred informazzjoni dwar dan il-qasam. Dan hekk kif il-gvern ser ikun qiegħed iressaq fil-parlament tlett liġijiet ġodda dwar dan il-qasam. Liġijiet li bla dubju ta’ xejn huma pass fid-direzzjoni t-tajba imma li bħal kull liġi ġdida jeħtieġ li dwarhom ikun hemm dibattitu serju, vivaċi, oġġettiv u miftuħ għas-suġġerimenti. Dibattitu li jista’ jkun b’saħħtu biss jekk l-iskrutinju jkun wieħed rigoruż. Il-gvern m’għandux jieħu tali skrutinju bħala xi ħaġa negattiva; anzi għandu jara tali skrutinju bħala opportunita’ sabiex ġa la darba dawn it-tlett abbozzi jsiru liġi jkollna qafas legali serju.

Is-suċess ta’ dan il-pass jiddependi ħafna min kif il-gvern ser jassigura li d-dibattitu jkun wieħed oġġettiv u mhux xi eżerċizzju ta’ rubber stamp approval. Huwa ċar ukoll mid-diskorsi tal-bieraħ kemm tal-Kelliema tal-Partit Nazzjonalista għas-Servizzi Finanzjarji Kristy Debono kif ukoll mid-diskors tal-Kap tal-Partit Nazzjonalista Adrian Delia li l-Partit Nazzjonalista, bħalma diġa għamel f’bosta okkażjonijiet ser jimxi ggwidat mill-ispirtu ta’ l-aqwa interess nazzjonali l-ewwel u qabel kollox u mneżżgħa minn xi għamad partiġġjan.

   

Id-diskors tiegħi fil-Kunsill Ġenerali tal-PN fid-9 ta' Mejju 2018

Il-bieraħ kelli l-unur nindirizza l-Kunsill Ġenerali tal-Partit Nazzjonalista. Din kienet l-ewwel darba li ndirizzajt il-Kunsill Ġenerali tal-Partit Nazzjonalista minn meta ġie elett bħala Kap tal-Partit Nazzjonalista Adrian Delia. Qiegħed nagħżel li għal din il-ġimgħa nwassal dan id-diskors bħala l-artiklu li nikkontribwixxi ta’ kull ġimgħa fil-ġurnal In-Nazzjon għaliex il-messaġ tad-diskors huwa wieħed ferm għal qalbi.

Id-diskors

President, Kap, Viċi Kapijiet, Segretarju Ġenerali, Ħbieb,

Xi tfisser tkun temmen fil-valuri tal-Partit Nazzjonalista? X’inhu l-valur li għandu jgħaqqad kull persuna fi ħdan il-Partit Nazzjonalista? Li l-interess nazzjonali jiġi dejjem l-ewwel u qabel kollox; li l-imħabba lejn pajjiżna u lejn il-poplu timmotivana sabiex dak li nagħmlu nagħmluh għaliex ikun fl-aħjar interess nazzjonali.

U x’inhu dan l-aħjar interess nazzjonali? Pajjiżna x’għandu bżonn mill-Partit Nazzjonalista? Pajjiżna llum għandu bżonn ta’ gvern nadif, gvern trasparenti, gvern li tassew jemmen fil-meritokrazija, gvern li jiġġieled il-korruzzjoni u mhux jistituzzjonalizza l-koruzzjoni. Pajjiżna għandu bżonn gvern li huwa kapaċi jgħin sabiex tikber l-ekonomija, jiżdied l-investiment u jagħmel il-ħajja faċli għall-imprenditur mingħajr ma’ jinsa l-valuri soċjali u ambjentali u mingħajr ma’ jitfa’ f’rokna mwarrba lil dawk l-aktar vulnerabbli fis-soċjeta’.

Pajjiżna għandu bżonn Partit Nazzjonalista b’saħħtu, oppożizzjoni relevanti, dinamika; gvern alternattiv! U l-Partit Nazzjonalista kif jista’ jkun b’saħħtu?

Jista’ jkun b’saħħtu biss jekk ikun maqgħud wara valur wieħed; il-valur li l-interess nazzjonali jiġi l-ewwel u qabel kollox. Dan ma’ jfissirx li bejnietna ma’ jkollniex sfumaturi differenti; ma’ jfissirx li rridu kollha b’mod robotiku ngħidu l-istess ħaġa l-ħin kollu. Ifisser iżda li jeħtieġ li fil-konfront ta’ gvern li qiegħed inaqqar l-interess nazzjonali nkunu maqgħuda u sodi. Jeħtieġ li lkoll flimkien naħdmu spalla ma’ spalla. Jeħtieġ li ma’ nħallux kwistjonijiet trivjali jew personali jifirduna u b’xi mod ifixkluna milli naħdmu mingħajr heda għal interess nazzjonali.

L-interess nazzjonali jitlob mhux li jkollna Partit Nazzjonalista sieket jew dgħajjef; imma Partit Nazzjonalista b’saħħtu, dinamiku, li mhux biss ma’ jibżax mill-bidla imma jkun hu stess l-istrument tal-bidla. L-interess nazzjonali jitlob li kull wieħed u waħda minnha hawn ġew jgħati l-isforz ġenwin tiegħu sabiex pajjiżna jkollu gvern Nazzjonalista b’Adrian Delia bħala Prim Ministru.

Jekk nħarsu lejn l-istorja tal-Partit Nazzjonalista s-saħħa tagħna dejjem ġiet mill-fatt li fi ħdan dan il-partit kellek politiċi li għarfu jsibu l-bilanċ bejn l-importanza tar-rispett lejn id-diversita’ tal-fehmiet u l-importanza li dan il-partit jibqa’ partit demokratiku u dinamiku iżda fl-istess ħin għarfu l-importanza ta’ l-għaqda u li fl-interess nazzjonali jinġibed ħabel wieħed.

Jekk minn naħa l-oħra nonqsu milli nagħmlu dan; allura dak li qiegħed u ser ikompli jiġri lil pajjiżna jkun parzjalment ħtija tagħna wkoll. Jekk nippermettu sitwazzjoni fejn il-Partit Laburista jibqa’ għaddej romblu min fuq kollox u kullħadd u nagħmluha faċli għal Partit Laburista sabiex jagħmel dan allura t-tort ikun tagħna wkoll.

Fil-film magħruf V for Vendetta jingħad li “People shouldn't be afraid of their government. Governments should be afraid of their people”. Ejja naraw li pajjiżna jirritorna lura għal din in-normalita’ demokratika.

Ejja nsaħħu l-Partit Nazzjonalista, ejja nwettqu l-bidliet li hemm bżonn, ejja nagħmlu dan il-partit wieħed aktar dinamiku, enerġetiku, żgħażugħ u relevanti. Ejja fuq kollox naħdmu lkoll flimkien, id f’id, partit wieħed b’għan wieħed, l-imħabba lejn din l-art ħelwa, l-omm li tgħatna isimha!  

Il-valur tal-ħajja u l-vot ħieles

Fl-aħħar jiem kien hemm dibattitu vivaċi dwar il-valur tal-ħajja u speċifikament dwar il-proposti ta’ tibdil fil-liġi li tirregola l-IVF f’pajjiżna. Fuq naħa l-Prim Ministru Joseph Muscat ħareġ jiftaħar li l-grupp parlamentari Laburista kien ser jivvota b’mod maqgħud dwar din il-materja; anke jekk fil-media feġġew rapporti persistenti ta’ oppożizzjoni ċara għal dak li qiegħed jipproponi l-gvern minn ħdan il-grupp parlamentari Laburista stess u fuq in-naħa l-oħra il-Kap tal-Partit Nazzjonalista Adrian Delia kien konsistenti ma’ dak li kien wiegħed fil-kampanja sabiex ġie elett kap u fuq materja hekk sensittiva ta’ vot ħieles lill-grupp parlamentari Nazzjonalista sabiex kull deputat jivvota skond il-kuxjenza.

Din il-materja hija tassew waħda sensittiva u għalhekk bir-raġun li l-Kap tal-Partit Nazzjonalista Adrian Delia ta’ vot ħieles. Fuq naħa din hija materja li għandha rabta ntrinsika mal-valur tal-ħajja u sagrosantita tal-ħajja. Materja b’rabta diretta mal-mument tal-konċeviment ta’ l-uman u mal-mod kif il-ħajja li tkun għadha mhux mwielda tiġi trattata u stmata. Minn naħa l-oħra hija wkoll materja li timpatta bil-qawwi tant u tant nies li jkollhom xewqa kbira li jibdew familja li tkun tinkludi l-ulied. Tant u tant nies li diġa jkunu għaddew minn martirju minħabba diffikultajiet sabiex jikkonċevu b’mod naturali u li jaraw lit-teknoloġija medika moderna bħala l-aħħar soluzzjoni sabiex ikollhom l-ulied.

Fuq kwistjoni hekk sensittiva u delikata diffiċli taqta’ linja bajda u sewda jew agħar min hekk, linja spirata mill-partiġġjaniżmu jew l-politika tal-pika jew il-kalkoli elettorali. Hija wkoll materja li dwarha, anke jekk wieħed ikollu fehma ċara, tajjeb li juri sensittivita’ fi kliemu.

Sfortuntament fl-aħħar jiem kien hemm ukoll nuqqas ta’ kjarezza dwar xiex qed nitkellmu; min forsi b’nuqqas ta’ għarfien u min forsi għax għoġbu jorbot kwistjonijiet oħra rabta ċoff ma’ din il-kwistjoni. Id-dibattitu hawn mhuwiex fuq il-proċedura ta’ l-IVF u jekk pajjiżna għandux jagħmel użu mit-teknoloġija ta’ l-IVF. L-IVF hija teknoloġija li tgħin fil-ħolqien tal-ħajja u li għenet bosta koppji u li bl-iżviluppi mediċi ser tkompli tgħin aktar koppji. Huwa sewwa u ġust li pajjiżna joffri t-trattament tal-IVF u sewwa u ġust li pajjiżna jkollu liġi dwar l-IVF li tkun waħda aġġornata maż-żminijiet. Min qiegħed jinqeda bid-dibattitu dwar it-tibdiliet proposti sabiex jattakka l-IVF b’mod ġenerali qiegħed jiżbalja bil-kbir u juri nuqqas ta’ sensittivita enormi.

Iżda l-proposti mressqa mill-gvern jmorru ferm lill’hinn minn sempliċi IVF li tgħin fil-ħolqien tal-ħajja fejn forsi b’mod naturali jista’ jkun hemm impediment ċar. Il-proposti mressqa jmorru ferm lill’hinn minn sempliċi każ ta’ aġġornament tal-liġi. Il-proposti mressqa mhumiex kwistjoni ta’ ugwaljanza jew nuqqas tagħha. Huwa ċar kristall li pajjiżna għandu jkun pajjiż fejn tirrenja ugwaljanza totali bejn is-sessi, bejn l-orjentazzjonijiet sesswali, bejn mudelli differenti ta’ familja u bejn nies b’fehmiet reliġjużi u politiċi differenti.

Il-problema tal-proposti mressqa hija unikament il-fatt li dawn il-proposti għandhom diffetti legali kbar, jgħatu lok għal ambigwitajiet legali enormi, jikkumerċjalizzaw il-valur tal-ħajja u jiftħu l-potenzjal għal sitwazzjonijiet vagi ħafna. Huwa għalhekk li fuq bażi personali, li kieku kelli vot dwar dawn il-proposti, jien nagħżel li nivvota kontra. Li kieku l-proposti saru b’mod li jirispetta l-valur tal-ħajja mill-bidu sat-tmiem naturali tagħha kieku bla dubju ta’ xejn is-sitwazzjoni kienet tkun mod ieħor.

Naturalment vot kontra m’għandux ifisser it-tmiem tad-dibattitu. Vot kontra għandu jfisser li pajjiżna għandu jniedi proċess ta’ konsultazzjoni ma’ l-esperti sabiex tinstab soluzzjoni li kif tista’ tisaħħaħ u tiġi aġġornata l-liġi preżenti mingħajr ma’ niftħu Pandora’s box sħiħa.

F’dan is-sens bla dubju ta’ xejn għandu ħafna x’joffri l-Professur Pierre Schembri Wismayer li kien strumentali sabiex saret l-ewwel liġi fl-2012 u li fl-aħħar jiem kien fuq quddiem joffri veduti li huma mnibbta min għarfien xjentifiku, sens ta’ rispett lejn il-ħajja u sens politiku oġġettiv.  

Malta u t-thedida ta’ Artiklu 7

It-Trattat ta’ Liżbona li huwa qafas legali importanti fil-mod kif topera l-Unjoni Ewropea jinkludi artiklu numru 7. Dan l-artiklu jipprospetta x-xenarju fejn jekk pajjiż membru ta’ l-Unjoni Ewropea b’xi mod flagranti jikser xi prinċipju fundamentali stabbilit f’artiklu 2 ta’ l-istess trattat tali stat membru jista’ jara numru ta’ passi meħuda kontrih fosthom is-sospensjoni tiegħu tad-dritt tal-vot fi ħdan il-Kunsill. Wieħed mill-prinċipji elenkati f’artiklu 2 huwa dak tas-saltna tad-dritt jew kif tisejjaħ bl-Ingliż Rule of Law.

Bażikament il-prinċipju tar-Rule of Law huwa dak li jistabilixxi li f’pajjiż il-liġi għandha tapplika bl-istess mod għal kullħadd. Huwa dak il-prinċipju legali li jistabilixxi li l-liġi f’pajjiż għandha tassigura sitwazzjoni ta’ fair play, ġustizzja u trasparenza fil-governanza pubblika. Għalhekk tista’ tgħid li huwa prinċipju li jmur lejn iċ-ċentru nett u l-qafas tad-demokrazija nnifisha.

Hekk kif fl-aħħar xhur Malta kienet is-suġġett ta’ tħassib serju dwar l-istat tas-saltna tad-dritt f’pajjiżna, fuq livell internazzjonali ma’ naqsux dawk li b’mod estrem ħafna itteorizzaw jekk Malta tafx issib ruħha suġġetta għal invokazzjoni ta’ artiklu 7 tat-trattat ta’ Liżbona.

Dan ix-xenarju jqajjem żewġ punti importanti. L-ewwel u qabel kollox għandu jkun ċar kristall li ebda Malti ma’ għandu jgħati appoġġ għal invokazzjoni ta’ artiklu 7. L-invokazzjoni ta’ artiklu 7 ikollu fuq pajjiżna konsegwenzi mill-aktar negattivi; kemm f’sens politiku kif ukoll f’sens ekonomiku. Li pajjiżna jispiċċa fi ħdan l-Unjoni Ewropea bid-dritt tal-vot sospiż ifisser li pajjiżna jkun f’riskju kbir li jsib ruħu suġġett għal leġiżlazzjoni li tmur kontra l-interess nazzjonali, bħal per eżempju r-rata ta’ taxxa korporattiva komuni. Hija ħasra li bħal donnu hawn min irid jgħati l-impressjoni li l-Partit Nazzjonalista qiegħed johrok idejh għall-invokazzjoni ta’ artiklu 7, jew agħar min hekk qiegħed jaħdem hu stess sabiex dan iseħħ. Gidba faħxija li ma’ tagħmel xejn ħlief deni lil isem pajjiżna. Fil-fatt il-Kap tal-Partit Nazzjonalista Adrian Delia kien ċar dwar dan u fuq is-sit tal-MaltaToday stqarr bla tlaqliq, “I am not informed or aware of such a move, but even if I knew this was a mere possibility, I would immediately start a campaign to ensure this does not come about,” the PN leader said. “I cannot make this any clearer: such a move will never have my support, whoever might push for it”.

It-tieni punt li dan ix-xenarju jqajjem huwa bla dubju ta’ xejn il-mod kif il-gvern qiegħed jaġixxi. Huwa ċar li realistikament bħalissa m’hemm ebda ċaqliqa sabiex jiġi invokat artiklu 7 kontra Malta. Madankollu, bħalma jgħidu bl-Ingliż we should not push our luck. Li l-gvern jibqa’ għaddej business as usual minkejja dubji serji minn ġurnalisti barranin, minn kumitati tal-Parlament Ewropew, minn opinjonisti lokali u internazzjonali, minn NGO’s lokali u internazzjonali u anke minn politiċi mhux biss lokali iżda anke internazzjonali li jgawdu stima kbira bħas-Senatur Repubblikan fl-Istati Uniti John McCain, ma huwa xejn għajr għaġir li jagħmel dannu lil isem Malta u li ċertament ma’ jgħinx biex ixejjen il-mistoqsijiet fil-konfront ta’ Malta. Daqstant ieħor dak il-gvern li minkejja kull argument jew dubju mressaq fil-konfront tal-kariga ta’ Konrad Mizzi u Keith Schembri jagħżel li jibqa’ għaddej qisu ħadd qatt ma’ qal xejn.

Pajjiżna jeħtieġ li tassew ikun maqgħud fuq dan il-front. Tali għaqda tinkiseb mhux billi jsir tixwix kontra l-oppożizzjoni jew l-MEP’s tagħha; mhux billi tintwera arroganza kbira u nipprovaw nkunu bulldozer imma billi ningħaqdu lkoll bħala Maltin u naraw li bl-azzjonijiet tagħna nxejnu kull lok ta’ dubju u ngħatu lil isem pajjiżna lura l-ġieħ li jixraqlu.

It-tmiem tal-2017 u l-bidu ta’ l-2018

Ninstabu fl-aħħar jiem tas-sena 2017 u għalhekk ftit jiem il-bod mill-bidu tas-sena 2018. Bħalma jiġri lejn kull tmiem ta’ sena, dawn l-aħħar jiem tas-sena jkunu okkażjoni perfetta sabiex niftakru ftit minn xiex inkunu għaddejna matul is-sena. Niftakru mhux għax għandna nħarsu lura imma sabiex nieħdu l-lezzjonijiet ta’ dak li jkun offra l-passat riċenti u nitgħallmu minnhom għal futur.

L-Elezzjoni Ġenerali
Is-sena 2017 fetħet fuq nota ta’ skandlu internazzjonali li kien qiegħed joħloq pressjoni kbira fuq il-gvern Laburista, jiġifieri l-iskandlu tal-Panama Papers. Il-gvern Laburista kien qiegħed isib ruħu bi kritika internazzjonali u b’dubji dejjem jikbru minn ċirku dejjem jikber fis-soċjeta’ u anke fuq livell internazzjonali. F’Ġunju 2017 il-Prim Ministru għamel kalkolu politiku u sejjaħ elezzjoni ġenerali. Kien kalkolu politiku meqjus u korett f’termini elettorali għaliex il-Partit Laburista ħareġ rebbieħ bil-kbir. Kien kalkolu żbaljat għal kollox iżda f’termini ta’ kemm tali riżultat kien ser iservi ta’ proċess ta’ white wash għall-akbar skandlu politiku li qatt ra pajjiżna. Il-gvern Laburista qiegħed itemm l-2017 bl-istess mod li bdiha; b’dubji dejjem jikbru u b’kritika ħarxa fuq livell internazzjonali.

Daphne Caruana Galizia

L-2017 tibqa’ mfakkra wkoll għall-qtil brutali tal-ġurnalista Daphne Caruana Galizia. Kien qtil barbaru u brutali li ħasad lil kull min għandu għal qalbu l-liberta’ u d-demokrazija f’pajjiżna. Dan il-kapitlu mill-aktar iswed li nfetaħ beraħ f’Ottubru 2017 ser jibqa’ magħna fix-xhur li ġejjin fl-2018. Il-qtil ta’ ġurnalista investigattiva huwa ta’ għajb għal pajjiż li jaspira li jkun meqjus bħala demokrazija Ewropea. Pajjiżna issa qed jistenna li dwar dan il-każ iseħħ ġustizzja.

Adrian Delia, David Agius u Robert Arrigo
Is-sena 2017 kienet sena ta’ bidla għal Partit Nazzjonalista. Kienet is-sena li fiha t-tesserati bl-aktar mod miftuħ u demokratiku għażlu bl-liberta’ sħiħa lil Adrian Delia bħala Kap tal-Partit Nazzjonalista, b’David Agius u Robert Arrigo bħala Viċi Kapijiet. It-triq il-quddiem għal Partit Nazzjonalista mhijiex waħda faċli u bla dubju ta’ xejn l-2018 ser tkun sena ta’ sfidi għal Partit Nazzjonalista. Perswas iżda li bi spirtu ta’ għaqda, naħdmu lkoll id f’id, taħt it-tmexxija ta’ Adrian Delia nistgħu mill-ġdid noffru lil pajjiżna Partit Nazzjonalista b’saħħtu; oppożizzjoni pożittiva li toffri l-id tal-ħbiberija fejn ikun fl-aqwa interess nazzjonali u fl-istess waqt tkun tarka ta’ difiża u toffri kritika ċara u ħarxa fejn l-aqwa interess nazzjonali jitlob li jsir hekk.

Donald Trump
Fuq livell internazzjonali l-figura ta’ Donald Trump iddominat l-aħbarijiet. Il-Presidenza ta’ Trump bħal donnu qegħda tassigura li l-Partit Repubblikan ser ikollu sfida iebsa sew f’kull elezzjoni li jmiss fl-Istati Uniti sakemm idumm din il-Presidenza. Trump kien elett fuq biljett populist; biljett li fih wiegħed lil kullħadd kollox u kanta d-diska li ħafna riedu jisimgħu. Din id-diska ġiet kantata anke jekk kien ċar li kien ser ikun impossibli li titwettaq. Bla dubju ta’ xejn is-sena 2017 kienet kulurita għal Trump; minn stejjer ta’ tkeċċija wara l-oħra fil-gvern tiegħu, għal suċċess parlamentari fir-riforma tal-liġi tat-tassazzjoni, għal kontroversja internazzjonali dwar id-dikjarazzjoni ta’ Ġerusalemm bħala l-belt kapitali ta’ Iżrael, għal numru ta’ telfiet elettorali koroh għal Partit Repubblikan.

L-2018
Diffiċli wieħed jgħid x’ser toffri l-2018. Għalhekk ejja nħarsu lejn il-futur b’lenti pożittiva u b’entużjażmu. Minn hawn nieħu l-opportunita’ nawgura lil qarreja kollha ta’ In-Nazzjon bidu tas-sena mill-aqwa. Appell ukoll sabiex kullħadd jiċċelebra lejliet l-ewwel tas-sena b’responsabilita’. Ejja nieħdu gost mingħajr ma’ nkunu ta’ deni għal ħadd.

A spent force!

To say that I am highly sceptical of Marlene Farrugia and her Partit Demokratiku would be an understatement. The way events unfolded following the General Election in June 2017 have more than amply demonstrated that joining forces with a Partit Demokratiku that was, and remains, largely dominated by Marlene Farrugia was a mistake. I have made no secret of my political disagreement with Farrugia and a number of decisions she has made since June 2017, so much so that I stated so point blank in an article published on The Times on August 22nd 2017.

I must thus highly welcome the decision taken tonight by the PN to formally dissolve the alliance with the Partit Demokratiku. In fairness it would be wrong to point fingers as to whether it was initially a good idea or not to join forces with the Partit Demokratiku. It would be easy to point fingers when one enjoys the benefit of hindsight; its an altogether different reality when one is deciding on a step never before tried and tested. Alas time has provided hindsight and the PN did the right move of taking correctionary measures.

Marlene Farrugia’s PD proved to be an unreliable ally; an unsteady ally, an ally that was never quite fully accepted by the electorate, an ally that was weakening PN rather than strengthening it. To cut ties was not an easy decision I’m sure. It took courage and a sense of leadership to come to such a decision. PN leader Adrian Delia must thus be applauded for having grabbed the bull by the horns and taking this difficult, but all be it, very much needed, decision.

PN needs to re-organise and focus on being a positive opposition. An opposition that that offers constructive criticism; an opposition that strives to make a difference even from the opposition benches; an opposition that is determined to be effective. It cannot possibly afford to waste any time with the childish games of Partit Demokratiku.

In reacting to the news of the dissolution of the Forza Nazzjonali PD issued a Press Release. Their Press Release goes a long way in proving just how irrelevant PD is fast becoming. PD stated that, “PD continues to welcome the disillusioned political refugees who have been failed by the parties forming the status quo and who, like the Partit Demokratiku and its MPs, do not recognise Adrian Delia as the Leader of the Opposition. The ideals of Forza Nazzjonali shall live on in PD, as they have since Delia's election”. No party can hope to have a very long future when its sole purpose seems to be that of rejecting the democratically elected leader of another political party.

Good move PN! Let’s focus and work for Malta. There is much work to be done and we can’t waste any more time on the antics of Farrugia and her party.
-->

Jien lest li ngħin...u int?

Nhar il-Ħadd li ġej il-Partit Nazzjonalista ser ikun qiegħed jorganizza maratona ta’ ġbir ta’ fondi. Bla dubju ta’ xejn ikun hemm min jistaqsi għaliex għandu jgħin lil Partit Nazzjonalista; għaliex għandu jgħin partit għal ħames snin li ġejjin ċertament ser ikun fl-oppożizzjoni; għaliex għandu jgħin partit li ġa la darba qiegħed fl-oppożizzjoni mhuwiex fl-aħjar posizzjoni biex jagħmel xita ta’ wegħdiet personali lil dak u lill-ieħor. Ikun hemm mbgħad min jilmenta li din mhijiex l-ewwel maratona ta’ ġbir tal-Partit Nazzjonalista; li matul din is-sena l-Partit Nazzjonalista diġa ħabbat il-bieb drabi oħra jitlob il-ġenerosita’ tal-pubbliku. 

Ir-realta’ hi li biex tħaddem partit trid il-fondi. Struttura organizzattiva kbira bħal Partit Nazzjonalista tirrikjedi numru ta’ ħaddiema full time u part time, fondi sabiex jinżammu strutturi fiżiċi bħal per eżempju manutenzjoni tad-Dar Ċentrali u manutenzjoni tal-Każini u fondi sabiex il-media tal-Partit Nazzjonalista tibqa’ aġġornata ma’ l-iżviluppi teknoloġiċi sabiex il-messaġġ tal-Partit Nazzjonalista jkun jista’ jasal b’mod effettiv. Partit politiku kbir jeħtieġ investiment kontinwu; aktar u aktar meta fi ħdanu jinkludi mhux biss l-element politiku ta’ partit imma anke l-element ta’ kull pjattaforma ta’ media u presenza fiżika fil-maġġoranza assoluta tal-bliet u rħula Maltin u Għawdxin. 

F’pajjiż demokratiku huwa importanti li f’kull ħin u mument ikun hemm gvern u oppożizzjoni li t-tnejn ikunu elettoralment b’saħħithom u f’posizzjoni li jaqdu r-rwol rispettiv tagħhom. Pajjiż bi gvern b’oppożizzjoni dgħajfa wisq aktarx ikun pajjiż fejn id-demokrazija tibda titnaqqar; fejn il-gvern jibda jħossu komdu bl-aktar mod flagranti jibqa’ għaddej minn fuq kullħadd daqs li kieku xejn m’hu xejn u mingħajr ma’ tali gvern jiffaċja ebda konsegwenza. Ċertament li kull min hu ta’ rieda tajba ma’ jridx li Malta jkollha dan ix-xenarju. Ċertament li kull min hu ta’ rieda tajba jrid li f’Malta l-poplu jkollu l-għażla demokratika bejn forzi politiċi differenti. Sabiex verament ikun hemm din l-għażla libera’ u demokratika huwa essenzjali li l-Partit Nazzjonalista jkun fi stat li jista’ joffri alternattiva kreddibli u jaqdi l-funzjoni tiegħu. Għal dan kollu hemm biss il-qalb tal-volontiera; il-ħidma bla waqfien ta’ l-attivisti iżda wkoll il-fondi. 

Il-Malti jgħid li bla flus la tgħannaq u l’anqas tbus. Ma’ jfissirx li l-flus huma kollox; ma’ jfissirx li l-qalb ġeneruża tal-volontiera u l-enerġija u l-entużjażmu ta’ l-attivisti ma’ tfisser xejn. Anzi, bil-flus biss, ikun kollox ta’ xejn għaliex ir-ruħ u l-pedament ta’ partit politiku hija l-qalb tal-volontiera u l-entużjażmu ta’ l-attivisti. Ir-realta’ iżda li li l-istil modern tal-politika fuq livell Ewropew huwa still li jinvolvi nfieq konsiderevoli. 

Mingħajr dubju ta’ xejn nhar il-Ħadd li ġej ser ikunu ħafna dawk li ser ikunu ġenerużi mal-Partit Nazzjonalista. Ser ikunu ħafna dawk li bl-għotja tagħhom, żgħira kemm hi żgħira, ser jgħinu sabiex f’pajjiżna jkollna oppożizzjoni li tista’ taqdi d-dmir u d-dover tagħha bl-aħjar mod possibli. Ser ikunu ħafna dawk li ser jgħatu sinjal ta’ appoġġ lil Partit Nazzjonalista; issa b’Kap ġdid Adrian Delia u bi tmexxija ġdida. 

-->