Partit li jħares 'il quddiem

Matul dawn il-jiem il-Partit Nazzjonalista beda proċess ieħor ta’ tiġdid fi ħdanu. Din id-darba skatta l-proċess ta’ tiġdid tal-Kumitati Sezzjonali tal-Partit Nazzjonalista u tal-fergħat tal-Partit Nazzjonalista. Proċess li jkompli mal-katina ta’ proċessi interni ta’ tiġdid li saru fi ħdan il-Partit Nazzjonalista fl-aħħar xhur.

Forsi jkun hemm min jesprimi xettiċiżmu dwar x’importanza jista’ jkollu l-proċess ta’ tiġdid tal-Kumitati Sezzjonali tal-fergħat tal-Partit Nazzjonalista. Il-verita’ iżda hi li dawn għandu jkollhom, u perswas li ser ikollhom, rwol mill-aktar kruċjali fil-Partit Nazzjonalista.

Il-Kumitati Sezzjonali tal-Partit Nazzjonalista mhumiex sempliċi kumitati ta’ fund raising jew sempliċi day to day administrators tal-każini tal-Partit Nazzjonalista madwar Malta u Għawdex. Dawn il-kumitati għandhom il-potenzjal li jkunu is-swaba tal-Partit Nazzjonalista fid-diversi lokalitajiet. Għandhom il-potenzjal li jkunu strument effettiv li jwassal lil Partit Nazzjonalista sabiex jibni politika li tkun tirrifletti l-asiprazzjonijiet tal-poplu. Għandhom il-potenzjal li jkunu strument kruċjali sabiex il-Partit Nazzjonalista jattira lejh nies li forsi fl-aħħar snin ħassewhom distakkati mill-Partit Nazzjonalista jew saħansitra nies li forsi tradizzjonalment qatt ma’ ħassew li setgħu jassoċjaw ruħhom mal-Partit Nazzjonalista.

Naturalment dan il-potenzjal ma’ jiġix sfruttat sempliċiment billi wieħed jikteb u jitkellem dwaru. Jiġi sfruttat billi tali Kumitati Sezzjonali jiġu mgħotija ċ-ċans u l-ispazzju meħtieġ u billi tali kumitati jkollhom l-għodda meħtieġa. M’għandi ebda dubju li fix-xhur li ġejjin tali mira ser tkun fil-qalba tal-politika amministrattiva tal-Partit Nazzjonalista.

Jekk il-Partit Nazzjonalista jerġa jgħati nifs ta’ ħajja ġdid lil Kumitati Sezzjonali allura jkun qed jiġi assigurat li l-Partit Nazzjonalista jkun beda t-triq li jerġa mill-ġdid isir il-Partit tan-nies u l-għażla naturali tal-Maltin.

Hemm mbgħad fi ħdan il-Partit Nazzjonalista il-fergħat. Dawn ukoll huma għodda utli għal Partit Nazzjonalista. Bħalma l-Kumitati Sezzjonali jipprovdu pont dirett bejn il-Partit Nazzjonalista u l-lokal, l-fergħat jipprovdu pont dirett bejn il-Partit Nazzjonalista u setturi differenti. Hawn ukoll m’għandi ebda dubju li fix-xhur li ġejjin il-ħidma amministrattiva tal-Partit Nazzjonalista ser tinkludi ħidma ċara sabiex il-fergħat jingħataw spazju akbar fi ħdan il-Partit Nazzjonalista u sabiex tali fergħat ikollhom l-għodda kollha meħtieġa.

Naturalment dan il-proċess ta’ tiġdid fi ħdan il-Partit Nazzjonalista qiegħed isir kollu għal għan wieħed; il-ġid nazzjonali. Huwa ċar li pajjiżna għandu bżonn Partit Nazzjonalista b’saħħtu, Partit Nazzjonalista maqgħud, Partit Nazzjonalista b’viżjoni u mira ċara, Partit Nazzjonalista fejn kullħadd qiegħed jaħdem id f’id taħt it-tmexxija ta’ Adrian Delia sabiex l-istess Partit Nazzjonalista jkun f’posizzjoni li joffri lilu nnifsu bħala gvern alternattiv. Malta jixraqilha aħjar mill-korruzzjoni istituzzjonalizata. Malta jixraqilha aħjar minn gvern li minkejja kull kritika jibqa’ għaddej business as usual anke jekk tali attitudni qegħda tkun ta’ thedida diretta għal fost l-aktar setturi ekonomiċi importanti għal pajjiżna.

It-tiġdid tal-Partit Nazzjonalista għalhekk mhuwiex xi proċess għan-Nazzjonalisti. Huwa proċess miftuħ għal dawk kollha ta’ rieda tajba. Proċess għal dawk kollha li jemmnu li pajjiżna għandu bżonn tama’ ġdida fil-politika. Għal dawk kollha li jemmnu f’mod ġdid ta’ kif issir il-politika.

Min hawn nrodd ħajr lil Kumitat Sezzjonali u fergħat uxxenti kollha filwaqt li bil-lest nawgura ħidma sfieqa lil kumitati u fergħat li ser jiġu eletti fil-jiem li ġejjin. Naturalment awgurju partikolari jmur għal kumitati tat-8 distrett elettorali, li fih jien kandidat għal elezzjoni ġenerali jiġifieri il-kumitati ta’ Birkirkara, Ħal Balzan, Ħal Lija u l-Iklin.