B’ħeġġa u enerġija għal Ħal Balzan

Nhar is-Sibt li ġej għandi l-unur u l-privileġġ li se nkun kandidat tal-Partit Nazzjonalista għall-Kunsill Lokali ta’ Ħal Balzan. Għalkemm din mhix l-ewwel darba li se nkun kandidat f’isem il-Partit Nazzjonalista u għalkemm din mhix l-ewwel esperjenza tiegħi fil-qasam tal-Kunsilli Lokali, din hija l-ewwel darba li se nkun kandidat fil-lokalita’ ta’ Ħal Balzan, il-lokalita’ li għal dawn l-aħħar erba’ snin u nofs kelli l-privileġġ insejħila d-dar tiegħi.

Ħidma b’risq Ħal Balzan

Il-Partit Nazzjonalista għandu programm elettorali ambizzjuż għal Ħal Balzan. Il-kunsillieri tal-Partit Nazzjonalista f’Ħal Balzan se jaħdmu fuq firxa wiesgħa ta’ oqsma bħall-ambjent, l-isfida tat-traffiku u l-parkeġġ fil-lokalita’, l-indafa fil-lokalita’, attivitajiet soċjali, ħidma fuq l-infrasturttura fir-raħal bħal bankini u toroq, ħidma b’risq l-għaqdiet fil-lokalita’, ħidma favur il-preservazzjoni tal-wirt storiku u bosta punti oħra ta’ ħidma.

Naturalment jekk ningħata l-fiduċja mill-poplu Balzani nhar is-Sibt li ġej, kommess li naħdem dwar dawn il-punti kollha b’enerġija sħiħa u b’impenn b’risq Ħal Balzan.

Dawn l-aħħar ħames snin kienu snin li fihom kibret fijja imħabba lejn ir-raħal ta’ Ħal Balzan. Imħabba għal dan il-villaġġ mill-isbaħ, mimli sbuħija storika u b’karattru uniku. Imħabba għal dan il-villaġġ b’poplu li laqgħani u f’qasir żmien ħaddanni bħala resident.

Dan hu villaġġ iżda li jeħtieġ li nibżgħu għas-sbuħija tiegħu u ma nħallux in-nuqqas ta’ ppjannar tal-awtoritajiet jeqred dawk il-karatteristiċi li jagħmlu lil Ħal Balzan il-villaġġ mill-isbaħ li hu. Villaġġ li jeħtieġ li fih ikompli jsir kull sforz favur l-indafa, favur ambjent aħjar, favur aktar green spaces u ħidma ffukkata kontra sfidi kbar li qegħdin iħabbtu wiċċhom magħhom il-Balzanin ta’ kuljum bħall-problema serja ta’ nuqqas ta’ parkeġġ u traffic flow qawwija fejn prattikament iċ-ċentru ta’ Ħal Balzan spiċċa kważi by-pass bejn żewġ by-passes.

Komunikazzjoni

Nemmen li hekk kif mal-mgħoddija taż-żmien saru żviluppi u bidliet fil-mezzi tal-komunikazzjoni, l-Kunsilli Lokali jeħtieġ li jagħmlu l-aqwa użu possibli tal-mezzi kollha disponibbli. Jeħtieġ li l-Kunsilli Lokali jkunu konxji tal-bżonn speċifiku li bejn il-Kunsill Lokali u r-resident ikun hemm sens ta’ komunikazzjoni miftuħa u bibien miftuħa. Determinat li l-ħidma tiegħi f’Ħal Balzan tkun waħda li dan il-punt tindirizzah ukoll. Ħidma li tkompli tibni fuq it-tajjeb li sar filwaqt li tkompli jsaħħaħ għaliex fid-dinja tajjeb li nkunu ambizzjużi u nfittxu li ntejbu u nsaħħu.

Pressjoni fejn meħtieġ

Tul l-aħħar snin il-gvern Laburista naqqar diversi poteri minn idejn il-Kunsilli Lokali. Kienu snin fejn il-gvern Laburista f’bosta okkażjonijiet għażel li jgħaddi romblu minn fuq il-Kunsilli Lokali jew jibda ħidma mingħajr ebda forma ta’ konsultazzjoni u dan b’detriment għar-residenti.

Determinat li parti mill-ħidma tiegħi, jekk ningħata l-fiduċja tal-ħbieb tiegħi l-Balzanin, tkun waħda ffukkata fuq il-ħtieġa li nżommu lill-Gvern to account, nagħmlu pressjoni fejn meħtieġ u naraw li l-affarijiet isiru b’mod għaqli u mhux b’mod li sempliċiment jiskomoda bil-kbir lir-resident. Din hija ħidma li m’għandi ebda dubju se tkun ta’ prijorita’ għat-team kollu tal-Partit Nazzjonalista. Mhux b’sens ta’ politika partiġġjana, mhux b’sens ta’ piki imma b’impenn sabiex niksbu għal Ħal Balzan dak li hu bi dritt ta’ Ħal Balzan.

Nhar is-Sibt li ġej

Nhar is-Sibt li ġej kull wieħed u waħda minna huwa msejjaħ sabiex jagħżel ħames kunsilliera għal Ħal Balzan. Wara li tul dawn l-aħħar erba’ snin u nofs dan ir-raħal laqgħani b’dirgħajn miftuħa sabiex illum il-ġurnata nħossni Balzani, huwa għalija dmir, dover u unur li naħdem bla waqfien għal dan ir-raħal u r-residenti tiegħu. Ħerqan għalhekk sabiex, jekk ningħata l-fiduċja tal-poplu Balzani, nibda minnufih bil-ħidma mingħajr heda għal Ħal Balzan.  

Grazzi Balzan FC

Nagħlaq bi messaġġ ta’ grazzi lil Balzan FC. Ir-rebħa ferm meritata kontra t-team Belti fil-finali tal-FA Trophy kienet okkażjoni storika għall-Balzanin kollha, okkażjoni li ġabitna flimkien bħala komunita’.

   

L-Isfida tal-25 ta' Mejju

Fadal ftit aktar minn ġimgħa qabel bħala poplu ninstabu msejjħa sabiex nagħmlu żewġ għażliet. Kull wieħed u waħda minnha jinstab msejjaħ sabiex fuq livell nazzjonali jagħżel sitt membri ġodda tal-Parlament Ewropew u fuq livell lokali jagħżel il-membri l-ġodda tal-Kunsill Lokali rispettiv.

Politika negattiva?

Matul din il-kampanja spikkat il-politika pożittiva tal-Partit Nazzjonalista. Dan huwa l-partit politiku li mill-bankijiet ta’ l-oppożizzjoni qiegħed iressaq proposti kemm bħala ħidma fuq livell Ewropew kif ukoll bħala ħidma fuq livell lokali. Partit politiku b’manifest elettorali li b’ħidma u impenn iwassal sabiex il-Partit Nazzjonalista jagħmel differenza konkreta fil-ħajja ta’ kuljum.

Li partit fl-oppożizzjoni jfittex li jagħmel differenza minflok ma’ sempliċiment ikun kritiku tal-gvern tal-ġurnata hija l-aqwa turija ta’ oppożizzjoni li tassew trid tibni politika tan-nies, politika li tagħmel differenza, politika pożittiva u propożittiva.

L-attakki ma’ jieqfux

Minn naħa l-oħra l-kampanja tal-Partit Laburista hija karaterizzata minn sensiela ta’ attakki negattivi fil-konfront tal-Partit Nazzjonalista. Kampanja li fil-qalba tagħha hemm biss il-mira li jiġi oskurat il-Partit Nazzjonalista u l-kap tal-Partit Nazzjonalista Adrian Delia u ftit li xejn hemm il-mira li ssir xi differenza.

Naturalment wieħed irid hawn jifhem li dawn l-elezzjonijiet huma elezzjonijiet li storikament li kien għal Partit Laburista ma’ kienux qegħdin isiru. Dan għaliex il-Partit Laburista kien il-Partit li oppona sia is-sħubija tagħna fl-Unjoni Ewropea kif ukoll it-twaqqif tal-Kunsilli Lokali f’pajjiżna.

Forsi dan ix-xettiċiżmu storiku iwassal sabiex il-Partit Laburista qajla jemmen li jista’ jagħmel differenza fuq livell Ewropew u fuq livell lokali jekk minflok ma’ juża l-enerġija u r-riżorsi tiegħu f’attakki politiċi jużahom fi proposti.

Il-messaġġ tagħna

Il-messaġġ tagħna bħala poplu jeħtieġ li jkun ċar. Messaġġ favur politika nadifa, politika onesta’, politika li temmen fil-ġustizzja, politika li tfittex li tagħmel differenza għal ħafna minflok differenza biss għal ftit. Politika mibnija fuq valuri sodi li tirispetta l-valur tal-ħajja, politika mibnija fuq il-premessa li l-iżilvupp ekonomiku u l-ħarsien ambjentali mhumiex għeddewa ta’ xulxin imma jistgħu jaħdmu id f’id jekk wieħed jagħraf iżomm bilanċ. Politika li hija interessata fil-kisba tar-riżultati għal poplu u mhux biss interessata fil-kisba ta’ rekords elettorali.

Dan il-messaġġ hemm biss mod wieħed kif ngħadduh b’mod ċar; vot lil kandidati kollha tal-Partit Nazzjonalista. Fuq il-lista hemm naturalment kandidati minn partiti politiċi oħra apparti dawk tal-Partit Laburista u Partit Nazzjonalista. Jeħtieġ li l-messaġġ tagħna ikun wieħed unit u b’saħħtu. Jekk il-messaġġ tagħna jinfirex inkunu qegħdin nagħmluha faċli sabiex il-messaġġ jidgħajjef.

10 kandidati ta’ ħila u kapaċita’

Il-Partit Nazzjonalista għandu fuq il-lista tiegħu għal Parlament Ewropew għaxar kandidati ta’ kapaċita’ u ħila. Kollha kandidati b’valuri sodi, kollha kandidati li lesti jxammru l-kmiem u jaħdmu. Kollha kandidati li ħaqqhom l-appoġġ tagħna għaliex kollha kandidati li ser jaħdmu fl-ispirtu pożittiv tal-Partit Nazzjonalista.

Team Balzan

Fil-każ tiegħi, fuq livell lokali għandi interess personali f’Ħal Balzan ġa la darba dan il-lokal huwa d-dar tiegħi u huwa wkoll fejn jien kandidat. F’Ħal Balzan kburi li ninstab parti mit-team tal-Partit Nazzjonalista; team magħmul minn sitt kandidati; kull kandidat b’ħafna x’joffri għal ġid ta’ Ħal Balzan u l-Balzanin. Hawn ukoll l-appell huwa għal vot għal kull kandidat tal-Partit Nazzjonalista, mill-wieħed sas-sitta.

Partit b’ambizzjonijiet ċari għal ġid ta’ Ħal Balzan

Matul din il-ġimgħa l-Partit Nazzjonalista nieda l-programm elettorali għal elezzjonijiet tal-Kunsilli Lokali li ser isiru fil-25 ta’ Mejju. Il-Partit Nazzjonalista li dejjem emmen fil-Kunsilli Lokali u dejjem ra li jgħati valur lill-Kunsilli Lokali nieda programm elettorali separat għal kull lokalita’ f’Malta u Għawdex; irrispettivament min jekk f’tali lokalita’ l-Partit Nazzjonalista għandux maġġoranza jew minoranza. 

Bħala kandidat fl-elezzjoni tal-Kunsill Lokali ta’ Ħal Balzan bla dubju ta’ xejn huwa ta’ interess partikolari għalija l-programm elettorali tal-Partit Nazzjonalista għal Ħal Balzan. Programm elettorali ambizzjuż mfassal fuq il-feedback tar-residenti Balzanin, li jkompli jibni fuq l-ħidma li saret minn Kunsilli Lokali preċidenti u programm li bl-aktar mod ċar għandu apprezzament ta’ l-isfidi li għandu Ħal Balzan u l-importanza li nħarsu dan ir-raħal ġawhra fiċ-ċentru ta’ Malta. 

Infrastruttura

Il-programm elettorali tal-Partit Nazzjonalista jagħmilha ċara li f’Ħal Balzan ser issir ħidma fuq il-bankini; kemm fis-sens ta’ tiswija ta’ bankini eżistenti kif ukoll permezz ta’ bini ta’ bankini ġodda. Il-PN jemmen li r-residenti Balzanin jixraqilhom bankini ta’ kwalita’ li jagħmlu l-ħajja faċli għal min għandu limitazzjonijiet fil-mobilita’. L-istess programm elettorali jitkellem dwar il-ħtieġa ta’ pressjoni fuq il-gvern ċentrali sabiex tkompli l-ħidma fuq bosta toroq f’Ħal Balzan liema toroq irridu niżguraw li jsiru b’mod effiċenti u fi żmien raġjonevoli. Jitkellem ukoll dwar kif it-toroq ta’ Ħal Balzan jeħtieġ li jkunu mdawla b’mod sew u b’teknoloġija li tħares l-ambjent. 

Il-lokalita’ ta’ Ħal Balzan hija sninonima ma’ ġonna u siġar u għalhekk huwa bix-xieraq li l-istess programm jitkellem ukoll dwar il-manutenzjoni ta’ playing fields, ġonna u li ssir ħidma ta’ tisbiħ li tirrispetta l-karatteristiċi li jagħmlu lil Ħal Balzan dak li hu. 

Traffiku, Parking u Trasport Pubbliku

Kull min jgħix Ħal Balzan huwa konxju mill-fatt li f’Ħal Balzan hemm influss ta’ traffiku qawwi, problemi kbar ta’ parkeġġ u ħtieġa ta’ żieda ta’ bus stops f’ċertu bnadi tar-raħal. Dawn l-isfidi mhux żgħar huma wkoll indirizzati f’turija ċara li l-Partit Nazzjonalista mhuwiex ser joqgħod lura milli bl-aktar mod ambizzjuż jaqbad il-barri minn qrunu anke dwar dawn il-kwistjoni tant delikati iżda tant vitali għal Balzanin. 

L-Ambjent u l-indafa

Ħal Balzan, lokalita’ sinonima mal-ġonna u l-karatteristiċi ta’ raħal Malti llum hija lokalita’ mgħedda min żvilupp mhux sostennibli. Il-Partit Nazzjonalista dejjem kien u jibqa’ favur l-iżvilupp basta tali żvilupp isir bi ħsieb u b’sens ta’ sostenibilita’. Għalhekk ser tkompli l-ħidma sabiex il-karatteristiċi li jsawru l-identita’ ta’ Ħal Balzan jiġu priservati. 

Naturalment ma’ tonqosx ħidma dwar l-indafa f’Ħal Balzan fosthom permezz ta’ ħidma sabiex is-sistema ta’ knis u l-ġbir ta’ skart titħaddem kif suppost u b’mod effiċjenti. 

Kommunikazzjoni u Konsultazzjoni

F’dinja ddominata mill-media soċjali l-ħtieġa ta’ komunikazzjoni b’saħħitha bejn ir-residenti u l-Kunsill Lokali hija ċara. Huwa ċar ukoll li f’dinja ta’ servizzi egovernment jeħtieġ li anke fuq livell lokali ssir ħidma f’dan is-sens. Għalhekk il-Partit Nazzjonalista f’Ħal Balzan kommess għal tisħiħ tal-kommunikazzjoni u użu mill-aqwa tal-mezzi moderni. 

Kultura, sport, l-element kummerċjali u għaqdiet fil-lokalita’ 

Ikun żball jekk ninsew l-isport, il-kultura, l-element kummerċjali, l-edukazzjoni u l-għaqdiet fil-lokalita’. Dawn ukoll huma punti li l-programm elettorali jindirizza b’ħidma li għandha sservi sabiex nkomplu nibnu fuq dak li diġa sar b’ambizzjoni li nkomplu nżidu l-ħidma u għalhekk ir-riżultati. 

Il-ħidma tiegħi

Dan il-programm elettorali huwa wieħed li personalment jimlini bil-kuraġġ, ħeġġa u enerġija sabiex nservi lill-lokalita’ ta’ Ħal Balzan. Huwa programm elettorali li jispirani aktar minn qatt qabel sabiex jekk fil-25 ta’ Mejju ningħata l-fiduċja minn sħabi l-Balzanin naħdem qatiegħ għal Ħal Balzan għaliex Ħal Balzan jixraqlu l-viżjoni u l-ambizzjoni li qiegħed joffri l-Partit Nazzjonalista f’dan il-programm elettorali.  

Flimkien Għal Pajjiżna

Il-bidu ta’ din il-ġimgħa kien ukoll il-bidu formali tal-kampanja tal-Partit Nazzjonalista għal elezzjonijiet li ser isiru fil-25 ta’ Mejju fejn il-poplu jinstab msejjaħ sabiex jagħżel is-sitt Ewroparlamentari li ser jirrapreżentaw lil Malta fil-Parlament Ewropew kif ukoll sabiex jelleġġi l-Kunsill Lokali fil-lokalita’ rispettiva tiegħu.

Huwa ċar li fil-25 ta’ Mejju l-poplu mhuwiex msejjaħ sabiex jagħmel għażla ta’ gvern ċentrali. Dak l-appuntament huwa skedat ghas-sena 2022 sakemm il-Prim Ministru Joseph Muscat ma’ jerġax jagħżel li jsejjaħ elezzjoni bikrija. Madankollu huwa xorta appuntament ta’ importanza kbira u li għalih il-Partit Nazzjonalista qiegħed juri determinazzjoni sħiħa.

Importanza fuq livell Ewropew

Fuq livell Ewropew il-votazzjoni tal-25 ta’ Mejju għandha importanza għaliex il-poplu għandha għażla ċara quddiemu. Minn naħa jista’ jagħżel li jgħati appoġġ lil min storikament kien xettiku fuq l-Unjoni Ewropea u min għażel li juża kull mossa disponibbli sabiex iħares l-interessi politiċi u partiġġjani tal-Partit Laburista minflok l-interess nazzjonali. Minn naħa l-oħra jista’ jagħżel li jgħati l-appoġġ lil min dejjem emmen fl-Unjoni Ewropea u min kellu jibbatlja x-xettiċiżmu ta’ ħaddieħor sabiex illum aħna membri. Jista’ jagħżel lil min għandu track record ċar ta’ ħidma favur il-poplu, favur il-ġustizzja, favur is-sewwa, favur il-vulnerabbli, favur il-valuri Ewropej tagħna u favur il-liberta’.

Importanza fuq livell lokali

Hemm mbgħad is-sejħa lokali. Il-Kunsilli Lokali huma għal darb’ oħra materja fejn id-differenza storika hija ċara. Partit Laburista li qatt ma emmen fil-Kunsilli Lokali u saħansitra issa fl-aħħar mossa qered il-Kunsilli Amministrattivi jew Partit Nazzjonalista li dejjem emmen fil-Kunsilli Lokali u dejjem għamel min kollox biex isaħħaħ ir-rwol tal-Kunsilli Lokali.

Il-gvern Laburista tul l-aħħar żmien kompla dejjem inaqqar ir-rwol u l-għodda tal-Kunsilli Lokali. Għalhekk il-vot tal-25 ta’ Mejju huwa opportunita’ tajba sabiex ikun hemm messaġġ ċar li l-poplu jemmen fis-sussidjarjeta’, jemmen fil-potenzjal tal-Kunsilli Lokali, jrid li l-Kunsilli Lokali jkollhom l-għodda meħtieġa u jrid li l-Kunsilli Lokali jkollhom rwol ċar u governattiv fil-lokalita’.

Il-Partit Nazzjonalista għandu team ta’ kandidati determinati li jagħmlu differenza fil-ħajja tar-resident. Kemm dawk il-kandidati f’lokalitajiet fejn tradizzjonalment il-Partit Nazzjonalista jkun f’minoranza kif ukoll min bħali huwa kandidat f’lokalita’ bħal Ħal Balzan fejn tradizzjonalment il-Partit Nazzjonalista jgawdi maġġoranza u fejn allura bir-raġun il-poplu jistenna’ riżultati konkreti u ħidma bla waqfien.

Triq iebsa

Naturalment irridu nkunu realistiċi. Il-Partit Laburista bħalissa għandu bosta vantaġġi politiċi; finanzjarjament għandu sodda mifruxa faċli, għandu power of incumbancy assoluta u għandu vantaġġ enormi fuq livell ta’ media bi stazzjon tiegħu u ieħor nazzjonali li huwa kollox għajr imparzjali. Il-Partit Nazzjonalista għaddej min żmien ta’ sfida fejn il-ħidma ma’ tonqosx imma fejn sabiex wieħed jieħu l-frott tal-ħidma għadu forsi kemm xejn prematur. Għalhekk realistikament huwa ċar li din l-elezzjoni ħa tkun iebsa għal Partit Nazzjonalista. Madankollu dan kollu għandu jsaħħaħ id-determinazzjoni tagħna; determinazzjoni li naħdmu bla waqfien, determinazzjoni li naħdmu b’enerġija u entużjażmu, determinazzjoni li nagħmlu differenza, determinazzjoni li niksbu riżultati għal pajjiżna; ħidma id f’id, spalla ma’ spalla Flimkien Għal Pajjiżna!