May day for May!

If for Julius Caesar the aides of March marked a grim milestone for Theresa May that milestone in political terms is set to be the aides of November. If the Chequers Agreement marked a troubled period for May and her Tories, the draft withdrawal agreement between the UK and EU is nothing short of a full-blown typhoon.

It is becoming increasingly clear that Theresa May has quite simply failed to deliver on what where some very crucial promises. Theresa May promised the UK a deal that would give the UK full sovereignty; a deal that would take all the power away from Brussels and return all the power back to London; a deal which at the same time would retain many of the perks and plusses of EU membership in terms of trade and commerce; a deal that would see the UK enjoy the best of both worlds. It was always a tall order; if not an outright impossible one.

What Theresa May has delivered instead is an agreement which basically reaches none of the above aims. The UK will still have to follow the EU’s cue if it wants to have any realistic chance of having a decent trade arrangement with the bloc. The arrangement would also not feature many of the perks and plusses of EU membership but would instead leave the UK out in the cold in the decision-making process thus reducing the UK to a mere rule accepter.

In fairness to May, the problem did not lie with Theresa May alone. It lay with the very foundations of Brexit. A Brexit that was founded on concepts of grandeur and British imperialism that in the modern-day world is quite simply no longer reality. A Brexit whose gist was the very essence of wanting the cake and wanting to eat it.

It was also a Brexit built on a Tory party that has not been deserving of government for a very long time. Indeed, the last principled Tory at Number 10 was John Major and he’s been out of politics for quite a few generations now. The Tory’s grapples with the European question have indeed now become the UK’s grapples. The volcano of the European question has now erupted and unless the Tories come to terms quickly it could quite simply be the Tories version of Pompei.

As May keeps losing minister after minister, having a majority in the Commons is looking ever less likely. May thus has only one honourable solution; resign as Prime Minister and leader of the Tory party and call a fresh General Election. A General Election which would decide once and for all whether the UK should persist in the cul-de-sac that Brexit is turning out to be or whether the UK should reverse the decision and make the best of EU membership.

I must say I don’t envy the UK voter; having to pick between the non-option that are the Tories, the disorganised shambles that is British Labour led by the unrealistic and cut off from reality Jeremy Corbyn or the impotent Lib Dems is liking asking someone whether he’d prefer to be on a sinking ship or an aeroplane set to clash.

Il-battalja tal-lingwi

Wieħed mill-aspetti li jsawwar l-identita’ Maltija moderna huwa, bla dubju ta’ xejn, il-bilingwiżmu. Malta għandha l-unur u l-privileġġ li minkejja li għandha storja ta’ ħakma wara l-oħra b’mod prattikament kontinwu sa l-1964, għandha lsien nativ. L-istorja iżda wasslet ukoll sabiex l-Ingliż f’Malta rabba għeruq sodi tant li llum il-ġurnata din il-lingwa, ta’ oriġini barranija, hija lsien rikonoxxut mill-kostituzzjoni ta’ Malta.

L-aspett bilingwali ta’ pajjiżna huwa aspett li għandna nħarsu. L-ewwel u qabel kollox għaliex dan l-aspett bilingwali huwa parti integra mill-identita’ tagħna bħala poplu. Huwa aspett li fih nnifsu jservi ta’ xhieda għall-istorja ta’ pajjiżna. Pajjiż li minkejja li għamel tant seklu maħkum, dejjem żamm sod l-identita’ tiegħu u għalhekk żamm il-lingwa nativa tiegħu. Pajjiż iżda li fl-istess mod ma ddejjaqx jintegra fi ħdan il-komunita’ internazzjonali u għamel tiegħu l-lingwa Ingliża, lingwa li permezz tagħha l-Malti jingħaqad mal-komunita’ internazzjonali permezz ta’ din il-lingwa li llum il-ġurnata saret kważi l-lingwa internazzjonali fid-dinja tal-punent.

Għalhekk huwa ċar li bejn il-Malti u l-Ingliż m’għandu jkun hemm ebda sens ta’ gwerra jew battalja. Pajjiżna jeħtieġ li jkollu livell eċċellenti kemm tal-lingwa nativa tiegħu kif ukoll ta’ dik il-lingwa li llum il-ġurnata saret kruċjali f’dinja dejjem aktar globalizzata. Malta mingħajr il-Malti tkun Malta b’parti mill-aktar importanti tar-ruħ soċjali tagħha nieqsa. Malta mingħajr l-Ingliż tkun Malta li tpoġġi lilha nfisha fi żvantaġġ ekonomiku enormi u tipperikolha għal kollox is-setturi tas-servizzi, bħal finanzi, informatika u gaming li llum huma tant pilastri fil-qafas ekonomiku.

Huwa fid-dawl ta’ dan kollu li r-riżultati tal-eżamijiet fl-iskejjel primarji mħabbar riċenti huwa ta’ tħassib. L-ewwel u qabel kollox, huwa fatt li l-eżami mhuwiex kollox u li l-kultura li kollox idur madwar l-eżami jeħtieġ li tiġi riformata, kif fil-fatt se jsir attentat li jsir. Iżda n-numri jagħtu bażi tajba sabiex wieħed jara x-xejra nazzjonali x’inhi.

Il-marka medja fil-Malti, dejjem fil-livell ta’ skejjel primarji, hija dik ta’ 69; inqas minn dik għall- Ingliż u għall-matematika, għalkemm tirrapreżenta titjib fuq il-marka tas-sena preċidenti. Minkejja t-titjib, marka ta’ 69 fil-lingwa nativa tagħna hija bla dubju ta’ xejn marka li għandha tqanqal tħassib dwar kemm tassew qegħdin ntellaw soċjeta’ li taf tħaddem il-lingwa nativa. Il- marka medja fl-Ingliż minn naħa l-oħra hija dik ta’ 70, aħjar minn dik tal-Malti, imma tirrapreżenta tnaqqis pjutost drastiku mill-marka tas-sena preċidenti. Marka li ma tawgura xejn tajjeb li għada pit għada nkunu soċjeta’ li tista’ toffri bħala wieħed mill-vantaġġi tagħha, kmand tajjeb tal-lingwa Ingliża.

Hemm bżonn li ssir ħidma li bħala mira ċara jkollha mhux it-titjib tal-livell f’lingwa jew oħra, jew sforzi separati imma sforz wieħed kolletiv sabiex pajjiżna jippreżerva l-kultura bilingwi tiegħu. Sforz wieħed kolletiv sabiex ikollna soċjeta’ li għandha kmand ugwalment fluwenti u tajjeb fil-Malti u fl-Ingliż, kemm fil-kitba kif ukoll fid-diskors.

Dan ma jsirx billi nwarrbu xi lingwa jew oħra jew nirrelegawha bħala xi lingwa tat-tieni post. Dan ma jsirx l-anqas billi nagħmlu kruċjata kontra xi lingwa jew oħra jew nġibuha xi tabboo li tuża dik il-lingwa. Dan isir billi jintwera rispett lejn iż-żewġ lingwi, billi ssir ħidma sabiex ikun hemm titjib fiż-żewġ lingwi u billi ngħarfu l-importanza assoluta taż-żewġ lingwi.

The Blockchain Island

Il-bieraħ bħala Forum Professjonisti Partit Nazzjonalista (FPPN) organizzajna konferenza bit-titlu The Blockchain Conference. Konferenza li matulha kellna kelliema, lokali u internazzjonali, li għenu sabiex inkisbet aktar informazzjoni dwar il-blockchain u l-crypto currencies.

Forsi l-ewwel u qabel kollox tajjeb li fi kliem sempliċi wieħed ifisser il-kliem blockchain u crypto currency. Fi kliem sempliċi ħafna blockchain hija sistema moderna u elettronika ta’ kif jinżamm kont ta’ transazzjonijiet. Bħalma fil-passat mill-ktieb tal-bank qlibna għall-internet banking u l-ATM Machines hekk ukoll il-blockchain jirrapreżenta l-pass li jmiss. Naturalment, bħalma spiss jiġri fl-avvanzi teknoloġiċi, l-blockchain mhijiex xi ħaġa ta’ interess għal bankiera biss imma għandha użu u implikazzjonijiet ferm aktar wiesgħa. Fil-fatt jekk wieħed jisfrutta l-potenzjal sħiħ tal-blockchain il-bidla ser taffetwa prattikament kull qasam fejn hemm transazzjoni.

Minn naħa l-oħra crypto currency hija mekkaniżmu ta’ investiment. Forsi mal-qarreja ta’ In-Nazzjon il-kelma Bitcoin hija aktar familjari minn crypto currency. Fir-realta’ Bitcoin hija biss eżempju wieħed ta’ crypto currency minn fost ħafna li hemm fis-suq. Mhijiex munita li biha tmur tixtri l-gazzetta jew tmur għand is-supermarket tagħmel ix-xirja. Hija pero’ tip ġdid ta’ investiment, li bħal kull investiment ieħor jista’ jitla’ jew jinżel fil-valur.

Irridu jew ma’ rridux dawn l-avvanzi ser jimpattaw lil Malta. Bħala pajjiż fejn is-settur finanzjarju huwa kolonna importanti fl-ekonomija, jeħtieġ li minflok nibqaw ċassi u nistennew sakemm nkunu lura nieħdu aħna l-ewwel pass u nilqgħu dawn l-avvanzi billi nippreparaw ruħna.

Pajjiżna jeħtieġ li jkollu qafas legali sod u robust sabiex ikun jista’ jkun minn ta’ quddiem nett kemm fl-adozzjoni tat-teknoloġija tal-blockchain kif ukoll fl-użu tal-crypto currencies. Dan il-qafas legali robust għandu jservi żewġ għanijiet prinċipali. L-ewwel u qabel kollox għandu jservi sabiex jiddefendi lil pajjiżna mill-possibilita’ ta’ abbuż. Bħal kull qasam ġdid, dan il-qasam, partikolarmanent il-crypto currencies, huwa miftuħ għar-riskju tal-abbuż. Abbuż li jkun ta’ detriment kemm għal konsumatur kif ukoll għar-reputazzjoni ta’ pajjiżna. Qafas regolatorju sod jgħin sabiex niġġieldu kontra din il-possibilita’. It-tieni nies, il-fatt li Malta jkollha qafas stabilit u regolarizzat għandha tgħin sabiex investituri serji jaraw f’Malta ġurisdizzjoni attrajenti u b’hekk il-possibilita’ ta’ investiment serju f’dan il-qasam tiżdied.

Huwa f’dan l-ispirtu li l-gvern għandu jilqa’ b’idejn miftuħa passi bħalma għamlet l-FPPN li xxerred informazzjoni dwar dan il-qasam. Dan hekk kif il-gvern ser ikun qiegħed iressaq fil-parlament tlett liġijiet ġodda dwar dan il-qasam. Liġijiet li bla dubju ta’ xejn huma pass fid-direzzjoni t-tajba imma li bħal kull liġi ġdida jeħtieġ li dwarhom ikun hemm dibattitu serju, vivaċi, oġġettiv u miftuħ għas-suġġerimenti. Dibattitu li jista’ jkun b’saħħtu biss jekk l-iskrutinju jkun wieħed rigoruż. Il-gvern m’għandux jieħu tali skrutinju bħala xi ħaġa negattiva; anzi għandu jara tali skrutinju bħala opportunita’ sabiex ġa la darba dawn it-tlett abbozzi jsiru liġi jkollna qafas legali serju.

Is-suċess ta’ dan il-pass jiddependi ħafna min kif il-gvern ser jassigura li d-dibattitu jkun wieħed oġġettiv u mhux xi eżerċizzju ta’ rubber stamp approval. Huwa ċar ukoll mid-diskorsi tal-bieraħ kemm tal-Kelliema tal-Partit Nazzjonalista għas-Servizzi Finanzjarji Kristy Debono kif ukoll mid-diskors tal-Kap tal-Partit Nazzjonalista Adrian Delia li l-Partit Nazzjonalista, bħalma diġa għamel f’bosta okkażjonijiet ser jimxi ggwidat mill-ispirtu ta’ l-aqwa interess nazzjonali l-ewwel u qabel kollox u mneżżgħa minn xi għamad partiġġjan.

   

Bejn kalkolu u skalkolu

Nhar it-Tlieta li għaddha l-Viċi Kap tal-Partit Nazzjonalista għal Affarijiet tal-Parlament David Agius, f’isem il-Partit Nazzjonalista ressaq talba lir-regolatur għas-sevizzi tad-dawl u ilma (REWS) sabiex dan, skond il-poteri mgħotija lilu mill-liġi, jinvestiga l-proċess li bih l-Arms qegħda toħroġ il-kontijiet tad-dawl u l-ilma.

Minn naħa tiegħu l-Partit Laburista qiegħed bħal donnu jilgħab xi logħba noli hekk kif filwaqt li fl-ebda ħin ma’ qiegħed jiċħad dak li qiegħed jgħid il-Partit Nazzjonalista, l-media Laburista qegħda tipprova tiżgwida lis-semmiegħa u telespettaturi tagħha.

Il-media Laburista qegħda tipprova tgħaqqad din il-kwistjoni ma’ xi kwistjoni dwar il-prezz ta’ kull unit ta’ dawl u ilma konsmati. Il-media Laburista qegħda tagħmel dan f’attentat ċar li tiżgwida lil pubbliku. Il-kwistjoni m’hijiex dwar il-prezz ta’ kull unit ta’ dawl u ilma. Dik hija diskussjoni separata u li fl-aħħar mill-aħħar m’għandha x’taqsam xejn mal-kwistjoni preżenti.

Il-kwistjoni preżenti hija dwar il-mod kif l-Arms qegħda taħdem il-kontijiet tad-dawl u l-ilma. Fl-ewwel skeda fil-liġi sussidjarja 545.01 hemm miktub bl-aktar mod ċar li fejn jidħol il-kalkolu dwar il-konsum f’post residenzjali,

Bla  ħsara  għad-dispożizzjonijiet  l-oħra  ta’  dawn  ir-  regolamenti,  Servizz għal Post Residenzjali ikun suġġett għat-Tariffa tal-Konsum li ġejja li hija bbażata fuq konsum kumulattiv annwali u li tista’ tiġi komputata fuq bażi pro rata:

i)Għal kull kWh ta’ l-ewwel 2,000 kWh ....................€0.1047; u

ii)Għal kull kWh fuq 4,000 kWh ta’ wara ...................€0.1298; u

iii)Għal kull kWh fuq 4,000 kWh ta’ wara ...................€0.1607; u

iv)Għal kull kWh fuq 10,000 kWh ta’ wara .................€0.3420; u

v)Għal kull kWh mill-bqija tal-konsum ......................€0.6076.

L-ewwel u qabel kollox wieħed irid jibda billi jifhem li, forsi għal kontra ta’ kif ħafna jaħsbu, l-konsum tad-dawl mhux kalkulkat bi prezz fiss għal kull unit konsumata. Aktar ma’ wieħed jikkonsma aktar jgħola l-prezz ta’ kull unit, f’miżura ċara ntiża biex tinkoraġixxi l-għaqal u n-nuqqas ta’ ħela. B’hekk jekk per eżempju wieħed juża 1800 kWh dan iħallas €0.1047 għal kull kWH imma jekk wieħed juża 2500 dan ser iħallas €0.1047 għal kull kWh sa 2,000 kWh u €0.1298 fuq il-500 kWh l-oħra li jkun ikonsma. Meta wieħed jieħu dan il-kalkolu fuq bażi annwali, malajr wieħed jifhem għalhekk li x-xhur fejn wieħed juża ftit elettriku, bħal per eżempju Marzu u April, jgħinu u jpattu għax-xhur fejn wieħed juża ħafna elettriku bħal Diċembru u Awwissu. B’jgħinu hawn qed nifhmu li jgħinu sabiex residenza kemm jista’ jkun ma’ tikkonsmax dawl bir-rata aktar għolja kif kwotat hawn fuq mill-liġi.

Li jidher li qiegħed isir fil-preżent huwa l-Arms qegħda taqsam dawn ir-rati fuq kull xahar, b’tali mod iżda li jekk wieħed ma jikkonsmax dawk il-units bir-rati l-irħas, dawn jintilfu u fix-xahar ta’ wara xorta jħallas r-rata l-għolja.

Mela, ejja nieħdu eżempju sempliċi ħafna. Jekk naqbdu 2,000 kWh u naqsmuh ugwalment bejn tnax il-xahar; jiġi 166.67kWh. Issa jekk per eżempju f’Marzu wieħed ikun uża 150kWh, jiġifieri jkun fadallu 16.67kWh bir-rata l-irħisa mhux użati, dawn is-16.67kWh ma jmorrux għax-xhur ta’ wara imma jispiċċaw jintilfu biex b’hekk jekk mbgħad fix-xahar ta’ wara, April, l-istess konsumatur ikun uża 183.34kWh, jiġifieri 16.67kWh aktar minn l-2,000 kWh mqassma tul tnax il-xahar, minflok mas-16.67kWh mhux użati f’Marzu jagħmlu tajjeb għas-16.67kWh użati over and above f’April, dawn is-16.67kWh jispiċċaw jitħallsu bir-rata aktar għolja. 

Il-liġi tgħid b’mod ċar li “bbażata fuq konsum kumulattiv annwali u li tista’ tiġi komputata fuq bażi pro rata”. Dan ifisser li filwaqt li kont jista’ jinħareġ bi frekwenza li tagħżel l-Arms għaliex il-liġi tgħid li jista’ jiġi komputat fuq bażi pro rata tali konsum irrid jittieħed fuq bażi kumulattiva annwali, jiġifieri fuq bażi ta’ sena sħiħa u ma’ jistax jiġi diviż bix-xhur b’xahar ma jkollu ebda rabta max-xahar ta’ warajh, meta wieħed qed jitkellem fi ħdan l-istess sena.

L-appell hawnhekk huwa wieħed ċar; il-gvern jeħtieġ li jaġixxi llum qabel għada sabiex dan l-abbuż sfaċċat jieqaf.

Id-diskors tiegħi fil-Kunsill Ġenerali tal-PN fid-9 ta' Mejju 2018

Il-bieraħ kelli l-unur nindirizza l-Kunsill Ġenerali tal-Partit Nazzjonalista. Din kienet l-ewwel darba li ndirizzajt il-Kunsill Ġenerali tal-Partit Nazzjonalista minn meta ġie elett bħala Kap tal-Partit Nazzjonalista Adrian Delia. Qiegħed nagħżel li għal din il-ġimgħa nwassal dan id-diskors bħala l-artiklu li nikkontribwixxi ta’ kull ġimgħa fil-ġurnal In-Nazzjon għaliex il-messaġ tad-diskors huwa wieħed ferm għal qalbi.

Id-diskors

President, Kap, Viċi Kapijiet, Segretarju Ġenerali, Ħbieb,

Xi tfisser tkun temmen fil-valuri tal-Partit Nazzjonalista? X’inhu l-valur li għandu jgħaqqad kull persuna fi ħdan il-Partit Nazzjonalista? Li l-interess nazzjonali jiġi dejjem l-ewwel u qabel kollox; li l-imħabba lejn pajjiżna u lejn il-poplu timmotivana sabiex dak li nagħmlu nagħmluh għaliex ikun fl-aħjar interess nazzjonali.

U x’inhu dan l-aħjar interess nazzjonali? Pajjiżna x’għandu bżonn mill-Partit Nazzjonalista? Pajjiżna llum għandu bżonn ta’ gvern nadif, gvern trasparenti, gvern li tassew jemmen fil-meritokrazija, gvern li jiġġieled il-korruzzjoni u mhux jistituzzjonalizza l-koruzzjoni. Pajjiżna għandu bżonn gvern li huwa kapaċi jgħin sabiex tikber l-ekonomija, jiżdied l-investiment u jagħmel il-ħajja faċli għall-imprenditur mingħajr ma’ jinsa l-valuri soċjali u ambjentali u mingħajr ma’ jitfa’ f’rokna mwarrba lil dawk l-aktar vulnerabbli fis-soċjeta’.

Pajjiżna għandu bżonn Partit Nazzjonalista b’saħħtu, oppożizzjoni relevanti, dinamika; gvern alternattiv! U l-Partit Nazzjonalista kif jista’ jkun b’saħħtu?

Jista’ jkun b’saħħtu biss jekk ikun maqgħud wara valur wieħed; il-valur li l-interess nazzjonali jiġi l-ewwel u qabel kollox. Dan ma’ jfissirx li bejnietna ma’ jkollniex sfumaturi differenti; ma’ jfissirx li rridu kollha b’mod robotiku ngħidu l-istess ħaġa l-ħin kollu. Ifisser iżda li jeħtieġ li fil-konfront ta’ gvern li qiegħed inaqqar l-interess nazzjonali nkunu maqgħuda u sodi. Jeħtieġ li lkoll flimkien naħdmu spalla ma’ spalla. Jeħtieġ li ma’ nħallux kwistjonijiet trivjali jew personali jifirduna u b’xi mod ifixkluna milli naħdmu mingħajr heda għal interess nazzjonali.

L-interess nazzjonali jitlob mhux li jkollna Partit Nazzjonalista sieket jew dgħajjef; imma Partit Nazzjonalista b’saħħtu, dinamiku, li mhux biss ma’ jibżax mill-bidla imma jkun hu stess l-istrument tal-bidla. L-interess nazzjonali jitlob li kull wieħed u waħda minnha hawn ġew jgħati l-isforz ġenwin tiegħu sabiex pajjiżna jkollu gvern Nazzjonalista b’Adrian Delia bħala Prim Ministru.

Jekk nħarsu lejn l-istorja tal-Partit Nazzjonalista s-saħħa tagħna dejjem ġiet mill-fatt li fi ħdan dan il-partit kellek politiċi li għarfu jsibu l-bilanċ bejn l-importanza tar-rispett lejn id-diversita’ tal-fehmiet u l-importanza li dan il-partit jibqa’ partit demokratiku u dinamiku iżda fl-istess ħin għarfu l-importanza ta’ l-għaqda u li fl-interess nazzjonali jinġibed ħabel wieħed.

Jekk minn naħa l-oħra nonqsu milli nagħmlu dan; allura dak li qiegħed u ser ikompli jiġri lil pajjiżna jkun parzjalment ħtija tagħna wkoll. Jekk nippermettu sitwazzjoni fejn il-Partit Laburista jibqa’ għaddej romblu min fuq kollox u kullħadd u nagħmluha faċli għal Partit Laburista sabiex jagħmel dan allura t-tort ikun tagħna wkoll.

Fil-film magħruf V for Vendetta jingħad li “People shouldn't be afraid of their government. Governments should be afraid of their people”. Ejja naraw li pajjiżna jirritorna lura għal din in-normalita’ demokratika.

Ejja nsaħħu l-Partit Nazzjonalista, ejja nwettqu l-bidliet li hemm bżonn, ejja nagħmlu dan il-partit wieħed aktar dinamiku, enerġetiku, żgħażugħ u relevanti. Ejja fuq kollox naħdmu lkoll flimkien, id f’id, partit wieħed b’għan wieħed, l-imħabba lejn din l-art ħelwa, l-omm li tgħatna isimha!  

Min vera jħobb lil Malta...

Tul l-aħħar xhur, prattikament min meta faqqa l-iskandlu tal-Panama Papers il-Partit Laburista nieda kampanja sottili, u xi kultant kemm xejn inqas sottili, li fiha kull min b’xi mod ażżarda jsemmu leħnu dwar il-koruzzjoni spiċċa mgħajjar bħala traditur tal-pajjiż u li saħansitra qiegħed jaħdem kontra Malta.

Huwa bla dubju ta’ xejn li kull Malti għandi jkun kburi minn pajjiżu u għandu jgħożż b’għożża dak kollu li jagħmilna Maltin. Pajjiżna għandu storja twila u rikka; storja ta’ poplu li minkejja ċ-ċokon tiegħu dejjem għeleb l-isfidi; anke dawk li ġnus oħra ferm akbar fid-daqs, ma’ rnexxielhomx jgħelbu. Pajjiż li minkejja ċ-ċokon tiegħu sawwar identita’ nazzjonali li tinkludi saħansitra lingwa nativa. Hemm ħafna b’xiex għandna nkunu kburin li aħna Maltin.

L-imħabba lejn Malta u dak kollu li jagħmilna Maltin madankollu ma’ jfissirx li m’għandniex ngħiduha kif inhi. Anzi, kważi kważi, propju għaliex nħobbu lil Malta, għandna nkunu aħna l-ewwel nies li nkunu kritiċi tagħna nfusna. Kritiċi tagħna nfusna sabiex fejn nistaw nagħmlu aħjar nagħmlu aħjar; kritiċi tagħna nfusna sabiex fejn b’xi mod inkunu qed indgħajfu lil pajjiżna nbiddlu, nirranġaw u nsaħħu.

Ieqaf ftit u aħseb; meta int tkun ser tagħmel xi proġett kbir jew forsi tkun ser tipprova xi ħaġa ġdida; dawk ta’ madwarek li huma għeżież għalik xi tkun tixtieq minnhom? Li anke jekk tiżbalja jew ikun evidenti li ser tiżbalja jibqaw siekta u ma’ jgħidu xejn u jħalluk tidħol fl-inkwiet jew li dawn iwissuk u forsi anke jkunu kritiċi sabiex int issir konxju ta’ fejn inqast jew ser tonqos u tikkoreġi u b’hekk itejjeb lilek nnifsek?

Daqstant ieħor min fil-konfront tal-koruzzjoni qiegħed ikun kritiku; qiegħed juri fejn l-awtoritajiet qegħdin jonqsu u qiegħed jagħmel dak kollu li huwa normali u ordinarju f’demokrazija moderna sabiex iwaqqaf lil min qiegħed jiżbalja u bl-iżball tiegħu idgħajjef lil Malta.

Min qiegħed ikun kritika mhux talli mhux traditur jew missu jistħi talli saħansitra huwa l-aqwa eżempju ta’ patrijott li tassew iħobb lil pajjiż. Min minn naħa l-oħra qiegħed iħalli l-għamad politiku jgħamih u jgħid Signor Si sempliċiment biex ma’ jurtax lill-partit politiku li tiegħu huwa membru, qiegħed bl-azzjoni tiegħu jitradixxi lil pajjiż għaliex qiegħed ipoġġi l-interess partiġġjan fuq l-interess nazzjonali.

Dak li qegħdin jagħmlu movimenti ċivili bħal Occupy Justice, Awturi u Kenniesa u partiti politiċi bħal Partit Nazzjonalista, il-Partit Demokratiku u l-Alternattiva Demokratika meta dawn qegħdin ikunu kritiċi tal-korruzzjoni li qegħda tifni l-gvern mhux talli mhux ispirat minn sens ta’ tradiment talli huwa ispirat minn sens ta’ mħabba lejn il-pajjiż.

Pajjiżna mhuwiex ta’ xi partit politiku wieħed jew agħar min hekk ta’ xi mexxej politiku partikolari. Pajjiżna huwa tagħna lkoll u jekk bl-azzjoni ta’ individwu, tnejn jew tlieta, qiegħed jiġi mdgħajjef il-pajjiż huwa d-dmir u d-dover ta’ kull wieħed u waħda minnha li jissielet b’kemm għandu enerġija sabiex jikkumbatti favur il-pajjiż.

Huwa għalhekk f’dan l-ispirtu li l-ħidma tal-Partit Nazzjonalista u anke ta’ l-MEP’s tal-Partit Nazzjonalista hija ħidma li għandha tħalli lil kull hu min membru tal-Partit Nazzjonalista kburi bil-fatt li anke fil-konfront ta’ tgħajjir u tixwix il-Partit Nazzjonalista baqa’ jpoġġi l-interess nazzjonali u l-imħabba lejn Malta u l-Maltin l-ewwel u qabel kollox.  

Il-valur tal-ħajja u l-vot ħieles

Fl-aħħar jiem kien hemm dibattitu vivaċi dwar il-valur tal-ħajja u speċifikament dwar il-proposti ta’ tibdil fil-liġi li tirregola l-IVF f’pajjiżna. Fuq naħa l-Prim Ministru Joseph Muscat ħareġ jiftaħar li l-grupp parlamentari Laburista kien ser jivvota b’mod maqgħud dwar din il-materja; anke jekk fil-media feġġew rapporti persistenti ta’ oppożizzjoni ċara għal dak li qiegħed jipproponi l-gvern minn ħdan il-grupp parlamentari Laburista stess u fuq in-naħa l-oħra il-Kap tal-Partit Nazzjonalista Adrian Delia kien konsistenti ma’ dak li kien wiegħed fil-kampanja sabiex ġie elett kap u fuq materja hekk sensittiva ta’ vot ħieles lill-grupp parlamentari Nazzjonalista sabiex kull deputat jivvota skond il-kuxjenza.

Din il-materja hija tassew waħda sensittiva u għalhekk bir-raġun li l-Kap tal-Partit Nazzjonalista Adrian Delia ta’ vot ħieles. Fuq naħa din hija materja li għandha rabta ntrinsika mal-valur tal-ħajja u sagrosantita tal-ħajja. Materja b’rabta diretta mal-mument tal-konċeviment ta’ l-uman u mal-mod kif il-ħajja li tkun għadha mhux mwielda tiġi trattata u stmata. Minn naħa l-oħra hija wkoll materja li timpatta bil-qawwi tant u tant nies li jkollhom xewqa kbira li jibdew familja li tkun tinkludi l-ulied. Tant u tant nies li diġa jkunu għaddew minn martirju minħabba diffikultajiet sabiex jikkonċevu b’mod naturali u li jaraw lit-teknoloġija medika moderna bħala l-aħħar soluzzjoni sabiex ikollhom l-ulied.

Fuq kwistjoni hekk sensittiva u delikata diffiċli taqta’ linja bajda u sewda jew agħar min hekk, linja spirata mill-partiġġjaniżmu jew l-politika tal-pika jew il-kalkoli elettorali. Hija wkoll materja li dwarha, anke jekk wieħed ikollu fehma ċara, tajjeb li juri sensittivita’ fi kliemu.

Sfortuntament fl-aħħar jiem kien hemm ukoll nuqqas ta’ kjarezza dwar xiex qed nitkellmu; min forsi b’nuqqas ta’ għarfien u min forsi għax għoġbu jorbot kwistjonijiet oħra rabta ċoff ma’ din il-kwistjoni. Id-dibattitu hawn mhuwiex fuq il-proċedura ta’ l-IVF u jekk pajjiżna għandux jagħmel użu mit-teknoloġija ta’ l-IVF. L-IVF hija teknoloġija li tgħin fil-ħolqien tal-ħajja u li għenet bosta koppji u li bl-iżviluppi mediċi ser tkompli tgħin aktar koppji. Huwa sewwa u ġust li pajjiżna joffri t-trattament tal-IVF u sewwa u ġust li pajjiżna jkollu liġi dwar l-IVF li tkun waħda aġġornata maż-żminijiet. Min qiegħed jinqeda bid-dibattitu dwar it-tibdiliet proposti sabiex jattakka l-IVF b’mod ġenerali qiegħed jiżbalja bil-kbir u juri nuqqas ta’ sensittivita enormi.

Iżda l-proposti mressqa mill-gvern jmorru ferm lill’hinn minn sempliċi IVF li tgħin fil-ħolqien tal-ħajja fejn forsi b’mod naturali jista’ jkun hemm impediment ċar. Il-proposti mressqa jmorru ferm lill’hinn minn sempliċi każ ta’ aġġornament tal-liġi. Il-proposti mressqa mhumiex kwistjoni ta’ ugwaljanza jew nuqqas tagħha. Huwa ċar kristall li pajjiżna għandu jkun pajjiż fejn tirrenja ugwaljanza totali bejn is-sessi, bejn l-orjentazzjonijiet sesswali, bejn mudelli differenti ta’ familja u bejn nies b’fehmiet reliġjużi u politiċi differenti.

Il-problema tal-proposti mressqa hija unikament il-fatt li dawn il-proposti għandhom diffetti legali kbar, jgħatu lok għal ambigwitajiet legali enormi, jikkumerċjalizzaw il-valur tal-ħajja u jiftħu l-potenzjal għal sitwazzjonijiet vagi ħafna. Huwa għalhekk li fuq bażi personali, li kieku kelli vot dwar dawn il-proposti, jien nagħżel li nivvota kontra. Li kieku l-proposti saru b’mod li jirispetta l-valur tal-ħajja mill-bidu sat-tmiem naturali tagħha kieku bla dubju ta’ xejn is-sitwazzjoni kienet tkun mod ieħor.

Naturalment vot kontra m’għandux ifisser it-tmiem tad-dibattitu. Vot kontra għandu jfisser li pajjiżna għandu jniedi proċess ta’ konsultazzjoni ma’ l-esperti sabiex tinstab soluzzjoni li kif tista’ tisaħħaħ u tiġi aġġornata l-liġi preżenti mingħajr ma’ niftħu Pandora’s box sħiħa.

F’dan is-sens bla dubju ta’ xejn għandu ħafna x’joffri l-Professur Pierre Schembri Wismayer li kien strumentali sabiex saret l-ewwel liġi fl-2012 u li fl-aħħar jiem kien fuq quddiem joffri veduti li huma mnibbta min għarfien xjentifiku, sens ta’ rispett lejn il-ħajja u sens politiku oġġettiv.  

Il-Kmandament il-Ġdid li trid tiskot!

Fil-passat fejn ħassejt li kelli pubblikament nikkritika lil persuna li tkun qegħda tokkupa l-kariga ta’ Arċisqof ta’ Malta ma qgħatx lura milli nagħmel dan. Nemmen bis-sħiħ li l-kariga ta’ Arċisqof mhijiex waħda li tagħmel lil persuna li tkun qed tokkupa l-kariga l-fuq mill-kritika. Bħal kull persuna oħra, min ikun qed jokkupa l-kariga ta’ Arċisqof ta’ Malta huwa uman u għalhekk bħal kull uman ieħor huwa suxxettibli għall-iżbalji. Naturalment, bħalma wieħed għandu jagħmel f’kull kritika li jressaq, tali kritika għandha titressaq fl-ispirtu ta’ dibattitu matur li qiegħed iseħħ f’soċjeta’ demokratika fejn anke fejn ma’ naqblux fl-idejat, ma’ jonqos qatt ir-rispett reċiproku.

Daqstant ieħor iżda illum ma nistax ma nesprimix xokk għal dak li qiegħed jiġri fil-konfront ta’ l-Arċisqof attwali, Mons. Charles J Scicluna. Mons. Scicluna mhuwiex qiegħed jiġi kritikat għal dak li kiteb jew dak li qal. Mons. Scicluna mhuwiex qiegħed jiġi mistoqsi jamplifika dwar dak li kiteb u qal sabiex jgħati aktar sustanza lill-fehma tiegħu. Minflok, Mons. Scicluna qiegħed ikun suġġettat għal kampanja ta’ mibgħeda spjettata ntiża biss sabiex dan fil-futur jaħsibha darbtejn kemm jgħati l-fehma tiegħu.

Għalkemm il-kariga ta’ Mons. Scicluna mhijiex waħda politika imma waħda reliġjuża, Mons. Scicluna, f’demokrazija, għandu kull dritt li joffri l-veduta tiegħu jew li jesprimi qbil ma’ xi veduta li jkun esprima ħaddieħor. Anzi, wieħed jista’ anke jargumenta li bħala rgħaj spiritwali għandu d-dmir li ma’ joqgħodx sieket f’kantuniera imma li b’prudenza joffri l-veduta tiegħu.

Għalhekk huwa ta’ għajb li hawn min f’pajjiżna jrid jorbot sarima ma’ ħalq Mons. Scicluna, bl-iskuża li bħala mexxej reliġjuż dan m’għandux dritt jesprimi ruħu. Minn meta f’demokrazija għandna l-limiti fuq min jista’ jesprimi l-fehma libera tiegħu sakemm tali fehma ma tkunx waħda li tinċita l-mibgħeda jew l-vjolenza? Minn meta f’demokrazija gvern jista’ jagħżel minn għandu dritt jitkellem u min għandu d-dmir li jiskot fis-silenzju? Minn meta f’demokrazija hija normali li ssir kampanja sabiex mexxej reliġjuż jitneħħa mill-kariga għaliex dan esprima fehma, b’mod prudenti u mhux partiġġjan, bl-għajta li min jokkupa l-kariga għandu jkun bħal mummja li ma titkellem qatt?

Kien hemm mbgħad min prova jikkwota silta qasira minn diskors riċenti ta’ Papa Franġisku sabiex bħal donnu jgħatu l-impressjoni li Mons. Scicluna kien qiegħed anke jaġixxi kontra l-kliem tal-Papa. Jidher iżda li min għażel il-kwotazzjoni ftit ta’ widen kwotazzjonijiet oħra ta’ Papa Franġisku bħal meta per eżempju fl-1 t’Ottubru 2017 waqt diskors f’Cesena Papa Franġisku stqarr mingħajr tlaqliq li “Se il politico sbaglia, vai a dirglielo, ci sono tanti modi di dirlo: “Ma, credo che questo sarebbe meglio così, così…”. Attraverso la stampa, la radio… Ma dirlo costruttivamente. E non guardare dal balcone, osservarla dal balcone aspettando che lui fallisca”.

Dak li għamel Mons. Scicluna huwa assolutament f’dan l-ispirtu, li minflok baqa gallarija jistenna l-falliment tkellem fejn ħass li kellu jitkellem. Bla dubju ta’ xejn ma’ naqbilx ma’ kull fehma li qatt esprima ruħu dwarha Mons. Scicluna. Kien hemm u perswas li ser jibqa’ jkun hemm okkażjonijiet meta jkolli fehma differenti. Imma bla tlaqliq nesprimi l-ammirazzjoni assoluta tiegħi lejn dan il-mexxej sod, li ma’ jibżax mill-ostilita’ ta’ uħud u jibqa’ mingħajr biżgħa jew favur jagħmel dak li jemmen li huwa sewwa u ġust. Huwa għalhekk li għandi rispett assolut lejn l-Arċisqof Mons. Charles J Scicluna u min hawn nawguralu snin twal ta’ ħidma fostna l-Maltin.   

Bejn surplus u skandlu

Għal min isegwi b’mod regolari l-media tal-Partit Laburista, l-kelma surplus mhijiex ġdida. Anzi, l-kelma surplus saret prattikament ir-risposta għal kull mistoqsija. Għalfejn il-Partit Nazzjonalista qiegħed jikkritika l-fatt li l-gvern qed iħalli r-reputazzjoni ta’ pajjiżna titappan? Għalfejn hemm tħassib serju dwar dak li qiegħed jiġri f’Malta b’rabta mal-governanza tajba u l-mod kif jaġixxi l-gvern fil-konfront tal-korruzzjoni? Għalfejn il-media internazzjonali qegħda b’mod sistematiku u regolari tpinġi lil Malta f’dawl negattiv u oskur? Għal media Laburista r-risposta bħal donnu dejjem hi; għax jgħiru għas-suċċess tal-gvern li kiseb surplus!

Ejja nkunu ċari, li jkollna surplus hija bla dubju ta’ xejn xi ħaġa tajba. Ftit għandu jkun hawn dubju li ekonomija b’saħħita, rata ta’ tkabbir ekonomiku pożittiva u prospetti ta’ ħolqien ta’ xogħol ta’ kwalita’ huma aħbarijiet fl-interess ta’ kullħadd. M’hemmx aħmar jew blu f’dawn l-affarijiet; hemm biss l-interess nazzjonali. Dwar dan il-Partit Nazzjonalista dejjem kien ċar; l-interess nazzjonali għandu jiġi l-ewwel u xi ħaġa li toffri prospetti pożittivi għal pajjiżna għandha tiġi milqugħa b’dirgħajn miftuħin.

Dan iżda ma’ jfissirx li riżultat pożittiv f’aspett jikkanċella l-iżbalji serji u gravi li qegħdin isiru f’oqsma oħra. Anzi, l-fatt li pajjiżna kellu l-ħiela jikseb surplus minkejja l-iżvantaġġi ġeografiċi tiegħu, jitfa’ aktar piż fuq il-gvern biex jaġixxi b’mod li jkompli jisfrutta dan il-potenzjal.

Jekk ġardinar jeqred siġra marida tkun ħasra iżda forsi mhux telfa kbir ħafna; imma jekk ġardinar jeqred siġra b’saħħitha li diġa bdiet toffri l-frott allura l-ħarsa tkun kbira u l-ġardinar bla dubju ta’ xejn ikun irid iwieġeb ta’ għemilu ta’ kif irnexxilu jeqred siġra li b’mod konkrett kienet qegħda turi li għandha ħafna x’toffri u kienet diġa bdiet toffri.

Is-surplus ma’ wasalx b’kumbinazzjoni jew bil-ħila ta’ gvern wieħed. Wasal sforz snin ta’ ħidma kollettiva. Għalhekk jekk il-gvern jippermetti sitwazzjoni fejn l-avvanz ekonomiku ta’ pajjiżna jiġi mhedded jew saħansitra meqrud, l-gvern ikun bħal dak il-ġardinar li taħt il-gwardja tiegħu mietet is-siġra t-tajba. Is-settur tas-Servizzi Finanzjarji huwa pilastru fundamentalissimu għal pajjiżna. Huwa settur li jimpjega lil ħafna nies b’mod dirett u li joħloq xogħol għal ħafna oħra b’mod indirett. Xogħol dirett fil-qasam legali, f’dak ta’ l-accountancy, ta’ l-IT u xogħol indirett fil-qasam ta’ l-ospitalita’, tal-kirjiet ta’ uffiċini, tal-maintenance, supplies u tindif ta’ l-istess uffiċini u ovvjament b’mod ġenerali ta’ rittmu ekonomiku ta’ nfieq u investiment.

Meta investitur serju u ta’ reputazzjoni mpekkabli jiġi biex jagħmel għażla ta’ fejn ser jinvesti; l-ftaħir ta’ One News dwar ir-ratings ta’ Fitch mhux ser jimpressjonawh, l-anqas ma’ hu ser ikun impressjonat bil-ftaħir dwar is-surplus. Li jkun jgħodd għal dak l-investitur huwa li flusu jkunu f’pajjiż politikament u ekonomikament stabbli, pajjiż fejn il-liġi tgħodd l-istess għal kullħadd, pajjiż fejn ir-reputazzjoni hija waħda nadifa għaliex il-kunċett ta’ ma’ min rajtek xebbaħtek jgħodd ħafna fuq livell globali, pajjiż fejn tirrenja n-normalita’ demokratika li min jiżbalja jħallas ta’ għemilu u mhux jiġi premjat u pajjiż li jkun magħruf f’sens pożittiv u mhux bħala xi ġurisdizzjoni li magħha ma’ tridx tmissx għax tispiċċa tiċċappas.

Jista’ l-gvern, idu fuq qalbu, jgħid li b’għemilu qed jaċċerta li pajjiżna jkun tali pajjiż? Jista’ l-gvern, idu fuq qalbu, jgħid li din hija r-realta’ ta’ Malta taħt gvern Laburista? Jew minflok għandna gvern kuntent li jista’ jiftaħar bis-surplus u ma’ jimpurtah minn xejn aktar?

Malta taħt il-lenti ta’ Brussel

Fl-aħħar jiem il-Kummissjoni Ewropea ħabbret li kienet ser tniedi l-proċess għal proċeduri kontra Malta, magħrufa bl-Ingliż bħala infringement procedures b’rabta mas-sistema Maltija ta’ VAT fuq il-jottijiet. Pass li bla dubju ta’ xejn jirrapreżenta thedida diretta lill-industrija tal-jottijiet f’Malta u b’mod indirett thedida lis-settur tas-Servizzi Finanzjarji b’mod ġenerali, hekk kif il-Kummissarju Ewropew Pierre Moscovici ilu jagħmilha ċara li ftit li xejn għandu grazzja mas-sistema ta’ tassazzjoni Maltija.

Ir-realta’ hi li bħala pajjiż żgħir, ġeografikament maqtugħ fiżikament mill-Ewropa kontinentali, u b’popolazzjoni żgħira Malta trid tkun kreattiva sabiex tkun tista’ toffri lilha nfisha bħala kompetitur qawwi fis-suq globali kemm fl-instrudija tal-jottijiet kif ukoll fis-Servizzi Finanzjarji b’mod ġenerali. Jekk wieħed jgħati ħarsa fil-fatt lejn il-pajjiżi li Moscovici, li hu Franċiż, jħobb jattakka f’dan is-sens hemm il-Lussemburgu, Ċipru u l-Irlanda; kollha pajjiżi żgħar u għajr għal-Lussemburgu, kollha pajjiżi fil-periferija ġeografika u gzejjer.

Naturalment wieħed jista’ jispekola għalfejn Moscovici qiegħed idawwar il-kanuni fuq dawn il-pajjiż. Wieħed jista’ jispekola li Moscovici forsi huwa indirettament ispirat mill-fatt li dawn il-pajjiżi huma xewka ekonomika għal pajjiżi kbar bħal Franza u l-Ġermanja li jgawdu minn vantaġġi kbar minħabba l-kobor u l-posizzjoni ġeografika.

Huwa għalhekk li pajjiżi bħal Malta jridu jimxu b’kawtela kbira ma’ kull pass li jagħmlu. Fejn tidħol din l-industrija hekk sensittiva li tħaddem tant eluf b’mod dirett u tant eluf oħra b’mod indirett il-prijorita’ trid tkun li bl-ebda mod ma’ ngħatu lok għal inċidenti li jgħatu raġun lil xi ħadd xettiku bħal Moscovici biex isaħħaħ l-argument tiegħu kontra Malta.

Huwa għalhekk irresponsabilita’ kbira meta l-gvern jippermetti imġieba li saħħaħ il-karaterizzazjoni ta’ Moscovici kontra Malta. Karaterizzazzjoni ntiża biex teqred vantaġġ importantissimu ta’ Malta fil-qasam tal-jottijiet u tas-Servizzi Finanzjarji. Hija responsabilita’ u dmir tal-gvern li bil-maqlub jara li niex bħal Moscovici ma’ jsibu xejn xi jgħidu kontra Malta. Hekk kien il-każ taħt gvern Nazzjonalista mmexxi minn Lawrence Gonzi; Malta kienet diġa fil-mira tal-kritiċi għaliex kienet diġa xewka ekonomika, imma dak iż-żmien ħadd ma’ setgħa jsib xejn xi jgħid. Hekk qiegħed jipproponi wkoll il-Kap tal-Partit Nazzjonalista Adrian Delia, jiġifieri li jkollna gvern responsabbli li jara li l-kritiċi internazzjonali ma’ jkollhomx xi jgħidu u b’hekk l-argument tagħhom ma’ jkollu ebda saħħa. Saħħa li ironikament bħalissa ġejja minn dak li qiegħed jagħmel, jew forsi ma’ jagħmilx il-gvern Malti.

Jekk b’dak li jagħmel il-gvern ser iwassal sabiex nies bħal Moscovici tgħaddi tagħhom f’dan l-attakk bla bażi reali kontra Malta allura l-gvern ser ikollu jwieġeb għalfejn bl-imġieba tiegħu wassal, anke jekk b’mod indirett, għat-telf ta’ tant impjiegi; mhux biss l-impjiegi ta’ avukati, accountants u awdituri li forsi huma l-ewwel impattati imma ta’ setturi oħra bħal ħwienet ta’ stationary, nies fil-qasam tal-IT, nies fil-qasam ta’ tindif ta’ uffiċini, nies li jikru spazju għal uffiċini, ristoranti u bars li fihom jiġu ospitatti business lunches u business meetings u għalhekk ir-rittmu ekonomiku Malti b’mod ġenerali.

B’dak li ġara Malta diġa spiċċat taħt il-lenti ta’ Brussel; illum aktar minn qatt qabel jeħtieġ li we wake up and smell the coffee u nibdew naġixxu sabiex din l-industrija vitali li welled f’pajjiżna gvern Nazzjonalista u li tista’ tiġi deskritta biss bħala the goose that lays the golden egg nħarsuha u nkabbruha għas-snin li ġejjin.

Meta minflok tiddefendi l-ħajja, tiddefendi l-mewt!

“However, after a thorough analysis of how the right to life is interpreted within core treaties, it is clear to me that this right does not apply prior to birth and that international human rights law and mechanisms do not recognise a prenatal right to life. Thus, Malta’s total ban on abortion contradicts the norms of international human rights law, because it denies women a range of fundamental human rights. The Maltese authorities should remedy this situation.”. Kien dak, il-kliem skandaluż ta’ Nils Muižnieks li huwa l-Kummissarju għad-Drittijiet tal-Bniedem fi ħdan il-Kunsill ta’ l-Ewropa.

Diffiċli wieħed jemmen li propju l-persuna li suppost jiddefendi d-dritt tal-ħajja fl-Ewropa jasal jargumenta li huwa assurd li tgħati d-dritt tal-ħajja lil min ikun konċevut iżda għadu mhux mwieled. Diffiċli wieħed jemmen li propju l-persuna li suppost fil-ħidma tagħha targumenta fuq is-santita’ tal-ħajja minflok timbotta l-argument li l-ħajja mhux mwielda mhijiex ħajja iżda hija biss ftit ċelloli.

Din mhijiex l-ewwel darba li Muižnieks qajjem is-suġġett ta’ l-abbort f’Malta. Anzi, f’temp ta’ ftit ġimgħat qajjem dan is-suġġett darbtejn. Possibli din hija l-prijorita’ ta’ l-uffiċju tiegħu? Possibli li liġi li tippermetti l-qtil ta’ l-innoċenti f’Malta hija fuq il-lista tal-prijoritajiet tal-Kunsill ta’ l-Ewropa? Possibli li Muižnieks jemmen li huwa aktar importanti li f’Malta nippermettu l-qtil ta’ l-innoċenti milli li l-uffiċju tiegħu jindirizza kwistjonijiet serji ta’ razziżmu madwar l-Ewropa u ta’ vjolazzjoni tad-drittijiet ta’ minoranzi madwar l-Ewropa?

Għalkemm l-argument tal-fehma tal-maġġoranza huwa wieħed li forsi jista’ jkun perikoluż għaliex wieħed m’għandux jimxi b’sempliċi rule of the majority over the minority għaliex nkella fl-estrem taf tispiċċa the dictatorship of the majority over the minority il-fatt li l-abbort f’Malta għadu jsib oppożiżżjoni soda u inekwivoka mill-firxa wiesgħa ta’ l-ispettru politiku Malti għandha twassal biex jekk Muižnieks għandu nofs nitfa’ diċenza; li fil-fehma tiegħi bl-aktar mod ċar m’għandux; jaċċetta li f’Malta l-ħajja għadha meqjusa sagra ħafna, forsi aktar sagra minn ħafna pajjiżi Ewropej jew mill-Istati Uniti fejn trabba l-istess Muižnieks. Għandu jifhem li f’Malta ngħożżu l-fatt li nipproteġu l-ħajja sa mill-ewwel mumenti tagħha u mhux nqisu l-ħajja bħala xi ħaġa li takkwista d-drittijiet biss f’punt meta deċiż minn ħaddieħor imma li takkwista d-drittijiet sa mill-bidu nett tagħha.

Naturalment, dan ma’ jfissirx li Muižnieks m’għandux dritt tal-fehma tiegħu. Għandu dritt tal-fehma tiegħu u għandu dritt jesprimi l-fehma tiegħu bħalma għandu dritt kull min jemmen fil-liġi ta’ l-abort. Il-problema ta’ Muižnieks mhijiex għaliex tkellem favur l-introduzzjoni ta’ l-abort imma għaliex qiegħed jinqeda bil-kariga tiegħu biex jimbotta dan il-karru li bl-aktar mod ċar imur kontra dak kollu li jemmen il-maġġoranza tal-poplu Malti. Il-problema hi li qiegħed juża l-kariga tiegħu, u jipprova jinħeba wara skuża, biex jimbotta din il-kwistjoni.

Naqbel perfettament ma’ dak li qal il-Partit Nazzjonalista fl-aħħar jiem, jiġifieri li għandna nagħmlu minn pajjiżna mudell li jħares il-protezzjoni tat-tarbija fil-ġuf. Muižnieks fi żgħożitu rċieva l-edukazzjoni tiegħu fl-istat ta’ Kalifornja fl-Istati Uniti. Għalhekk bix-xieraq ngħalaq bi kwotazzjoni tat-tlieta u tlettin gvernatur ta’ Kalifornja, li kien ukoll l-erbgħin President ta’ l-Istati Uniti, Ronald Reagan, meta dan stqarr, “I've noticed that everyone who is for abortion has already been born.”. Kliem ta’ min jixtarru Sur Muižnieks!

Is-Servizzi Finanzjarji u l-interess nazzjonali

Malta bħalissa tinstab taħt lenti negattiva ħafna fuq livell internazzjonali. L-isem ta’ Malta flok qiegħed jiġi sinonimu ma’ ċentru ta’ eċċellenza fis-servizzi finanzarji qiegħed jsir sinonimu ma’ korruzzjoni istituzzjonalizata u kultura kbira ta’ xejn m’hu xejn. Dan it-timbru negattiv m’huwa xejn għajr xkiel dirett għat-tkabbir tas-settur tas-Servizzi Finanzjarji u thedida diretta għal ekonomija Maltija.

Jekk hemm settur fejn ir-reputazzjoni hija vitali dan bla dubju ta’ xejn huwa dak tas-Servizzi Finanzjarji. Ikun kollu ta’ xejn jekk għandna istituzzjonijiet li jaħdmu b’mod effiċenti, jekk għandna qafas legali mill-aqwa, jekk għandna l-skilled workforce u l-infrastruttura meħtieġa jekk imbgħad ir-reputazzjoni tagħna tkun waħda dubjuża. Investitur meta jagħżel fejn ser jinvesti flusu spiss ser jara li jkollu moħħu mistrieħ għal kollox li m’hemm ebda ombra ta’ dubju fuq fejn investa flusu. Investitur serju ma’ jkunx irid li b’xi mod jiċċappas u jibda jidher bħala investitur mhux serju u għalhekk jitlef il-kredibilita’ fis-settur.

Bla dubju ta’ xejn jekk is-settur tas-Servizzi Finanzjarji f’pajjiżna jmur lura l-effetti jkunu koroh ħafna. Din mhux kwistjoni ta’ Nazzjonalisti u Laburisti; din mhux kwistjoni ta’ politika partiġġjana. Din hija kwistjoni ta’ interess nazzjonali fejn huma l-ħafna dawk li jintlaqtlu jekk ma’ jittieħdux il-passi meħtieġa sabiex nħarsu isem pajjiżna. Forsi wħud jaslu jgħidu, imma bis-Servizzi Finanzjarji mhux l-avukati u l-accountants biss jaqilgħu x’jieklu? Mhux sempliċiment imorru jaħdmu l-qorti jew il-bank minflok?

Filwaqt li huwa vera li s-Servizzi Finanzjarji jipprovdu impjieg għal ħafna avukati u accountants, l-firxa hija ferm aktar wiesgħa. Kemm hawn f’pajjiżna nies fis-settur tal-IT li jipprovdu servizz ta’ manteniment tal-computers lil kumpaniji fis-Servizzi Finanzjarji? Kemm hawn f’pajjiżna nies li jipprodu servizz ta’ tindif jew handymen f’uffiċini ta’ kumpaniji fis-Servizzi Finanzjarji? Kemm hawn f’pajjiżna ristoranti jew kafeteriji li bħala sors ta’ klijenti għandhom business meetings, formali jew informali, li jsiru minn kumpaniji fis-Servizzi Finanzjarji? Kemm hawn f’pajjiżna kumpaniji li jbigħu prodotto ta’ stationary lill-uffiċini tas-Servizzi Finanzjarji? Il-katina hija waħda wiesgħa ħafna u tmur ferm lill’hinn minn sempliċi avukati u accountants.

Is-settur tas-Servizzi Finanzjarji f’pajjiżna hu dak li hu grazzi għal ħidma ta’ ħafna. Snin twal ta’ xogħol iebes sabiex pajjiżna bena dan is-settur li maż-żmien hija dejjem juru potenzjal ta’ tkabbir u jipprovdi niċċeċ ekonomiċi ġodda. Tkun tassew ħasra jekk dik il-ħidma kollha tintilef għaliex pajjiżna jagħżel li ma’ jieħux il-passi meħtieġa. Tkun tassew ħasra jekk nippermettu r-rivali internazzjonali tagħna jimmanuvraw b’mod li jkissru is-settur Malti, għal gwadan ta’ pajjiżhom, liema sitwazzjoni tkun biss possibli għaliex bħala pajjiż nkunu nqasna milli nieħdu d-deċiżjonijiet meħtieġa.

L-għadu tas-Servizzi Finanzjarji f’pajjiżna mhuwiex il-Partit Nazzjonalista. L-anqas huwa min qiegħed bir-raġun iqajjem id-dubji fejn hemm lok ġustifikat ta’ dubji. L-anqas huwa r-rival internazzjonali li wieħed jifhem li jrid iħares l-interess tiegħu. L-għadu tas-Servizzi Finanzjarji f’pajjiżna hija l-kultura ta’ xejn m’hu xejn; il-kultura fejn bħal donnu l-liġi mhijiex l-istess għal kullħadd. Il-ħarsien tas-Servizzi Finanzjarji jista’ jkun assigurat biss mhux billi nsiktu l-oppożizzjoni imma billi min għandu l-poter jieħu d-deċiżjonijiet jeħodhom.